Liberato Aureus

Si Liberato "Levy" Aureus (nmndg: Hunyo 23, 1935 - Septyembre 21, 2013) sarong Bikolanong kolumnista, humorista asin kagsurat kan librong An Sabi ni Levy. Ginawadan siya kan 2006 kan Premio Tomas Arejola para sa Literaturang Bikolnon kan pagbistong Masirang na Bitoon kan Kabikolan.

Si Levy Aureus

Siya namundag sa Bgy. Matoogtoog, Mercedes, Camarines Norte; siya an ika-tolong aki kan mag-agom na Ponciano S. Aureus kan Libmanan, Camarines Sur asin Iluminada Soria kan Basud, Camarines Norte. Nagdakula siya "sa pag-ataman ni Leon Aureus" asin "nakanood magsurat sa madiklom na apat na gilid kan Bicol Mail Printing Press na kaidto yaon sa kanto kan kalye P. Burgos asin Gen. Luna, siyudad nin Naga; nag-eskwela sa University of Nueva Caceres asin Ateneo de Naga, dai nakatapos nin kurso ta nag-agom tolos."

An napangagom niya iyo si Milagros Orbillo na inapod niyang "sarong inspirasyon bakong obligasyon," asin an pagsasaro ninda nagbunga nin siyam na mga "gwapo asin magayon na mga aki", sinda: Eleanor, Lourdes, Angelo, Ephraim, Levy Jr., Noel, Olivia, Rosalinda, Rosa Donna asin Ruby.

Nagtrabaho siya sa Department of Labor and Employment (DOLE), nagkahilig na magsurat nin rawitdawit na pinapadara sa mga istasyon nin radyo sagkod na siya nabantog na parasurat. Nagin man siyang kolumnista asta konsultant editoryal kan Bicol Mail. An bantog na kolum niya sa peryodiko semanal na ini iyo an Ilampog Ilabay na kan huri binago niya an pangaran sa An Sabi ni Levy. Pirang dekada ini regular na nagluluwas sa peryodikong ini.

Nagin man siyang direktor sa Junta Directiva sa Camarines Sur II Electric Cooperative, Inc (CASURECO II) representado an South District. Kan taon 1998, nagin siyang presidente kan Kooperatiba kan CASURECO asin nagtukaw siya sa siring na kargo nin sampolong taon, abot 2003.

Mga panluwas na takod

• Levy Aureus, sarong gurangan nang editor sa Bicol Mail
• Sarong librong mga pangisi ni Levy Aureus

Toltolan

• Retrato asin osipon kan buhay-buhay niya sinapi sa libro niyang An Sabi ni Levy.