Leon Aureus

Si Leon Sa. Aureus (1908-1969) sarong lider nin mga gerilya kan ika-2 Gerang Pangkinaban laban sa mga Hapon, sarong peryodista, sarong alkalde. Siya an pinakainot na alkaldeng nagtukaw (Desyembre 15, 1948 - Desyembre 1951) kan an Syudad nin Naga nagin nang sarong independienteng syudad sa kusog kan Akta Republika Nu. 305.

Kan panahon nin gera, siya an nagin Executive Officer kan si nabilog na armadong resistensya na inapod na Tangcong Vaca Guerilla Unit. An grupo ninda, katuwang an ibang grupong gerilya, naagaw sa kontrol kan mga mananakop na Hapon an munisipyo kan Naga nin pirang aldaw.

Pamilya

An saiyang ama iyo si Vicente Aureus, na nagin alkalde kan Libmanan, Camarines Sur. An ina niya sa pagkadaraga, an darang apelyido Salem. An napangagom niya iyo si Angeles Javier, na namundag sa Samar. An mga aki niya iyo sinda Leonor, na naagom si David Briscoe, sarong Amerikano, si Angeles, si Vince, asin si Leon, Jr.

Pagkaalkalde

Kan matapos an gera asin matoninong na, siya pignombrahan ni Pres. Elpidio Quirino bilang alkalde kan Naga kan ini, sa kusog kan Ley Republika 305, na inaprobaran kan Des. 15, 1948, ginibo nang sarong syudad na independiente sa probinsya. Nagtukaw siya abot Desyembre 1951. An konseho niya binibilog nin limang myembro na sinda Carlos A. Ruivivar (alabes bise-alkalde), Cornelio S. Abesa, Flor Y. Ybarola, Armando F. Medina asin si Rosendo R. Luntok.

Sa eleksyon kan Nob. 13, 1951, siya guminana komo kandidato para alkalde asin nagtukaw siya sa pwesto poon Enero 1952 sundo' Agosto 1953, alagad huli sa sarong rason pinagsalidahan na siya ni Anastacio M. Prila paglaog kan Septyembre 1953.

Siya an kagtogdas kan peryodikong semanal na Bicol Mail kan taon 1953. Kaamayan pa kaini, siya, kabakas si Elias Corporal sa pagpublikar nin sarong peryodiko, an The Bicol Pioneer-Herald (1933-1939), kun saen siya an nagin saro sa editor.

Onra

Kalye Leon Aureus sa Syudad nin Naga

Saiya ipinangaran an sarong lansangan sa siyudad nin Naga, an kalyeng nagbabaktas sa Kalye Magsaysay kun saen sa poro namomogtak an Naga City Science High School. Ini sa pagtaong onra saiya bilang pinakaenot na alkalde asin bilang saro sa kagtogdas asin opisyal kan grupong gerilya na iyo an Tancong Vaca Guerilla Unit. Sa kanto kan Kalye Leon Aureus asin Kalye Magsaysay yaon namogtak an dati niyang pinag'erokan na harong.

Mga panluwas na takod

• Mga alkalde kan Naga Archived 2005-12-03 at the Wayback Machine.

Mga hihilngan

• The Best Of (The Beast In) Nick V. Prieto. 228 p. 2000. Tiniripon asin kadamotan kan mga artikulong sinurat ni Prieto, na ipinagpublikar sa manlaenlaen na mga peryodiko asin magasin, igdi sa Naga saka sa Manila.