John Bongat
Si John Garcia Bongat sarong abogado, premyadong serbidor asin kompositor, asin iyo an dating alkalde kan Syudad nin Naga, Bikol sa laog nin tulong (3) surunod na termino poon 2010 sagkod 2019. Bago kaini, siya nagin man konsehal nin syudad sa laog nin tulong (3) surunod na turno poon 2001 sagkod 2010. Nagin myembro siya kan Partido Liberal kan Filipinas. Siya saro man na premyadong kompositor nin musikang Bikolnon.
| John Garcia Bongat | |
|---|---|
| |
| Alkalde kan Syudad nin Naga | |
| Termino 2010–2019 | |
| Personal na mga detalye | |
| Kamundagan | Hunyo 24, 1964 Syudad nin Naga, Camarines Sur |
| Nasyunalidad | Filipino |
| Partido politikal | Partido Liberal |
| Agom | Farah Rañola Bongat |
| Mga aki | Jade Finnella Rañola Bongat, Sean Calvin Rañola Bongat |
| Dinakulaan | Syudad nin Naga |
| Alma mater | Ateneo de Naga na Unibersidad Ateneo de Manila na Unibersidad Unibersidad kan Pilipinas |
| Kasibotan | politiko |
| Trabaho | abogado, kompositor |
| Pagtubod | Katolisismo |
Biograpiya
baguhonSiya akì ninda Roy Bongat asin Gloria Garcia. An saiyang inâ, kan nabalo ki Roy, napangagom ni Ramon Felipe, Sr. Si Garcia nagtrabaho sa Government Service Insurance System kun sain an dati niyang agom na si Roy sarô man sa assistant manager sa nasabing ahensya kan nabubuhay pa.
Nagtapos si Bongat nin elementarya sa Naga Parochial School asin nagpadagos nin sekondarya sa Ateneo de Naga na Unibersidad. Sa Manila, kinua niya sa kolehiyo an kursong political science sa Ateneo de Manila (1981-1985) dangan nagkua nin abogasiya sa Unibersidad kan Pilipinas (1985-1989).
Nag-eerok siya kan saiyang pamilya sa Dayangdang, Syudad nin Naga. Agom niya si Farah Rañola Bongat, sarong clinical instructor asin negosyante. Sinda igwang duwang aki: si Jade Finnella, asin Sean Calvin.
Dai nin pormal na ensayo, nagpoon an hilig niya sa musika kan yaon sa elementarya. Taon 1994 kan siya nanaog kan ikaduwa asin ikatulong premyo sa Tanog Bikol: Bicol Pop Music Competition na pinadrinohan kan Developmental Institute of Bicolano Artists (DIBA) sa saiyang mga komposisyon na "Padangat sa Kadlagan" asin "Magpaarog Kita". Kompositor man siya nin mga kantang Bikolnon siring man sa Ingles asin Tagalog.[1]
Bilang abogado, siya nagin junior lawyer sa Tan, Manzano & Velez Law Firm mantang editor-in-chief kan Integrated Bar of the Philippines Journal. Siring man siya nagin direktor para sa legad na asistensya nasyunal kan IBP poon 1990 sagkod 1993. Nagin junior lawyer man siya sa Bito, Lozada, Ortega & Castillo Law Firm (1993 - 1995) dangan magin assistant vice president for legal affairs asin corporate secretary kan Megaworld Corporation (1995 -1997) bago nagin sarong pribadong abogado.
Dating kolumnista si Bongat sa Bicol Mail, sa May Derecho Ka Dyan na manungod sa aplikasyon kan ley. Nagpondo ini poon kan nagtukaw siyang alkalde kan Syudad nin Naga. Ngunyan, igwa siya nin programa sa Home Radio 95.1 na nadadalan man sa paagi nin livestream, an Abogado Juan At Ur Service, dating Abogado Juan: Hapot mo, Simbag ko.
Pinagmidbid si Bongat kan saiyang alma mater huli sa saiyang kahanga-hangang serbisyo publiko asin pamamayo. Minidbid siya bilang Most Outstanding Alumnus kan Naga Parochial School kan 2013. Huli sa dedikasyon sa propesyon asin serbisyo publiko, asin dain takot na tagatulod kan ley, siya ginawadan nin pagmidbid kan Unibersidad kan Pilipinas - College of Law kan 2016. Saro man siya sa pipirang resipyente kan Bulawang Bicolnon Award na iginagawad kan Ateneo de Naga na Unibersidad kan 2019.
Politika
baguhonNaglaog si Bongat sa politika kan 2001 sagkod 2010 bilang konsehal. Kadaklan kan mga ordenansyang saiyang ipigtulod nakatotok sa paz y orden asin komersyo. Kagsurat siya kan Bantay Kataid, i-Serve Program, asin mga ordenansya kan Naga City Business Registry Databank. Pinamayohan niya an Project Monitoring Committee siring man an konseho sa Paz y Orden asin komite sa Appropriations.[2]
Nakatulong termino si Bongat bilang konsehal bago nagin alkalde kan syudad kan 2010. Sinundan nya si Jesse Robredo. Siya liwat na nanggana sa duwang suminonod na eleksyon sa siring na katungdan kun sain nadaog niya sa eleksyon na ini iyo sinda Jun Pelagio, Luis Ortega asin Fortunato Peña.
Nagserbe siya nin tulong turno bilang alkalde kan syudad kun sain durante kan saiyang termino siya nagawadan nin manlainlain na pagmidbid. Kabali digdi an Galing Pook Award 2018 gikan sa Galing Pook Foundation; SDGs Champion Mayor of Southeast Asia 2019 na iginawad kan United Cities and Local Governments–Asia Pacific (UCLG-ASPAC) sa Bangkok, Thailand; asin an Education Champion 2019 gikan sa Department of Education, Division of Naga City.[3]
Toltolan
baguhon- ↑ Paz Verdades M. Santos asin Jaime Jesus Borlagdan. Sa: John Bongat. BURABOD: Original Bikol Music. LJ Graphics & Literacy Exponent, Inc. (mayong taon nin publikasyon)
- ↑ JOHN G BONGAT sa PhilPro
- ↑ Hon. John G. Bongat Archived 2015-03-25 at the Wayback Machine. Naga.gov.ph
Mga panluwas na takod
baguhon- Si John Bongat sa Facebook
- An retrato niya sinapi' sa account niya sa Facebook.
Pinopoonan an artikulong ini sa Arte. Makakatabang ka sa Bikol Wikipedia sa pagparambong kaining pahina.