Leonor Dy-Liacco

Si Leonor Rojano Dy-Liacco (29 Des. 1920 - 12 Nob. 2008) sarong Bikolanang edukador, poeta, iskolar asin parasurat, nag'adal nin mahiwas dapit sa kultura asin historia kan Bikol, kagsurat nin mga librong pang-kultura, asin sarô sa kagmukna kan Kabikolan Cultural Association.

Pamilya

Siya namundag sa Minalabac, Camarines Sur. Siya an pinaka-ngohod na aki ni Juan Rojano asin Hilaria Granada. Naagom niya si Abogado William E. Dy-Liacco kan Enero 3, 1948 asin an pagsasaro ninda nagbunga nin duwang aki: si Gil asin si Becky. Nabalo siya kan Hunyo 20, 1991.

Edukasyon

Produkto kan eskwelas publikas, siya nagtapos hayskul sa Camarines Sur High School klase 1938, na valedictorian. Nagkua siya kan Batsilyer Artes na grado sa Unibersidad kan Pilipinas dangan nin Graduate Studies sa University of Nueva Caceres sa lindong ni Dean Bienvenido Santos. Nag-apat na polong taon siyang paratukdo sa irarom kan Departamento nin Edukasyon asin Kultura, nagin Superbisor sa Filipino sa probinsya kan Camarines Sur asin siring man General Education Supervisor.

An pagkamoot niya sa kulturang bikolnon dai matawaran asin bilog na buhay niya nagparasurat siya nin mga adal dapit sa anoman na Bikolnon na bagay, magin sa lenggwaheng Bikol, dapit sa kalakawan kan rona, dapit sa mga paguugale, mga tradisyon asin, huli ta harani sa puso niya an mga kaakian, nagsurat man siya nin mga libro na pwedeng basahon kan mga aki.

Sa mawot na mapakusog asin mapalakop an pagkamoot sa kultura nin Bikol, sarô siya sa nagtogdas kan Kabikolan Cultural Association asin kinaptan niya ini bilang pamayo nin 22 na taon. Sa kasararoan na iyan, kairiba niya sa Atty. Luis General, Jr., Fr. James O'Brien, S.J. Fr. Eduardo Lucero, Jaime Malanyaon, Atty. Alfredo Tria asin iba pang mga prominenteng mga parasurat sa rehiyon Bikol.

Mga napalagda' na libro

• Memories and Reminiscences. A collection of poems. 2nd ed. A.M.S. Press.1994. Sa Ingles.
• Sarung Dolot Sa Satuyang Ina. J & R Printing co., Inc. Parañaque, M. M. (1996?) Sa Ingles. Tiniripon na mga artikulo dapit sa historia kan Bikol kan mga iba-ibang parasurat.
• Ipinapamidbid: An Bikolana. 1997. A.M.S. Press. Naga City. Sa duwang seksyon- Kadamotan nin 61 rawitdawit na Bikol asin Pamidbid sa 10 Bikolana.
• Mga Osipon ni Tiyong Juan saka ni Tiyang Laling. Regal Printing C. Ltd. Hongkong.Pan-aki na libro. Anas sa Bikol.
• Mga Sambit asin Kawat nin mga Aki. A.M.S. Press. Naga City. 1998. Pan-aki na libro. Anas sa Bikol.

Mga artikulong sinurat

1. Bikol Syntax (1956)
2. Handiong, an epikong Bikol, pinalis sa Ingles
3. Siisay Nagsabi Na An Tataramon Na Bikol Kulang, Kulapos, Ilako, Tikapo, Alangan, Asin Dai Sangkap?
4. Bikol Courtship Ritual
5. The Pantomina
6. Nagkapirang Kabtang Kan Historia Kan Camarines Sur Na Nangyari Sa Minalabac.
7. Naga Of the 1930"s.
8. Folk Stories Of Our Elders

Mga ginawad saiyang pag'onra

• Lifetime Achievement Award, iginawad kan Premio Tomas Arejola para sa Literaturang Bikolnon (PTALB. Naga City) huli sa saiyang mga nahaman asin naginibo sa pagparambong kan kulturang Bikolnon.(2007)
• Outstanding Bikolana Award, iginawad kan The Bicol Women Convenor's Group, Legazpi City (1996)
• Most Outrstanding Bicolana, hale sa Samahan ng mga Kababaihan sa Kabikolan,Bicol University, Legazpi City (1996)
• Award of Distinction, hale sa Kababaihang Rizalista, Inc, Naga City (1994)
• Mayoral Distinguished Service Award, hale sa syudad kan Naga (1988)
• "Sarong Pag-Omao", hale sa Ateneo de Naga (1988)
• Cattleya Award, iginawad kan Philippine Association of University Women, Cam. Sur Chapter (1981)
• Special Mayoral Award for Work done in the Promotion of Bikol Culture, iginawad kan mag-ika-28ng Anibersaryo kan Syudad nin Naga (1976)

Hilingon man

• Mga rawitdawit niyang tokda'-

Dila Ko, Pagmaan

Nahihidaw Ko Daw

Pano An Pagdara?

Ratak An Ati

An Buhay Sa Uma

Ginonoan

• Datos sa buhay niya sinapi' sa libro niyang "Memories and Reminiscences". asin sa "Sarung Dolot Sa Satuyang Ina".
• Retrato niya sinapi' sa likod na patos kan librong "Memories and Reminiscences".

Mga panluwas na takod

• Leonor's Autograph
• Liftime Achievement Award Saiya Archived 2012-05-22 at the Wayback Machine.