Alfredo Tria

Si Alfredo R. Tria (Oktobre 6, 1926 - Agosto 6, 2003) sarong Bikolanong abogado, peryodista, komentarista sa radyo, kolumnista asin kagmuknâ asin kaglagdâ kan magasin na An Bicolnon saka kan peryodikong Handiong. Pirang beses man siyang nagdalagan sa eleksyon, enot sa pwestong alkalde sa Sangay (1970), sunod sa pwestong Assemblyman (1978) komo kandidato kan Bicol Saro, asin sa katongdan komo Kongresista sa ika-3ng Distrito kan Camarines Sur asin liwat sa parehong pwesto alagad sa ika-2nd Distrito. Sa gabos na pagkandidato niyang ini dai siya sinuwerte.

Edukasyon

Nagtapos siyang sekondarya sa Ateneo de Naga (ngunyan Ateneo de Naga University na), nagkuang kursong Journalism sa Far East University asin nin abogasiya sa Unibersidad nin Nueva Caceres. Nagtapos siya sa kursong ini kan 1959 alagad nagkua siyang Bar Exam kan 1961 pakatapos nin maigot na pagrebyu-na inonoy niya sana-asin nakalusot.

Pamilya

Namundag sa Sangay, Camarines Sur, siya nakaagom ki Zenaida Rey (Desyembre 1955), na namundag sa syudad kan Naga, asin nagtaong tolong aki saiya: si Zuyen (empleada sa Land Bank, Legazpi), Zayla (sarong nars, gadan na) asin si Adon Alfredo. Alagad, si Tria nabalo tolos ta nagadan an agom niyang si Zenaida kan taon 1959.

Karera

Manta' na siya nagprapraktis asin nag'aako nin mga kaso bilang abogado na an saiyang bufete yaon sa edipisyo kan Philippine National Bank, enot niyang pagkamoot iyo an pagsurat bilang peryodista asin kolumnista y komentarista sa radyo. May pusong matanos asin sa labis na pagtindog para sa malinig na palakaw sa gobyerno siya maisog na natuyaw sa programa niya sa radyo enot sa DZGE (Boses ni Handiong) asin kairiba niya an duwa pang abogado na sinda Luis General, Jr asin Antonio Carpio na binansagan na "Trio Los Panchos", sindang tolo may pigmantener na programa sa Radyo LRV kun saen makukusog an mga boses na nadenunsya kan mga korupsyon sa gobyerno asin nataong komento sa mga aro-aldaw na panyayari sa banwaan.

Sa panindogan niyang mahira an pana'naw kan mga botante, siya nagdalagan bilang kandidato sa magkapirang pwesto asin kalaban parati an incumbent o nakatukaw sa poder. Mala ta kan nagkandidato siya para alkalde sa Sangay kalaban niya iyo si Roberto Briones na nagin bise ki Alkalde San Felipe. Narawrawan an kandidatura niya ta may saro pa man na Tria (Nicolas an pangaran)an duminalagan sa parehong pwesto. Kan nagdalagan siya bilang Assemblyman asin saro sa doseng (12) kandidato kan Bicol Saro, tyempo nin Ley Militar (Martial Law, taon 1978) asin kalaban ninda an mga kandidato ni Presidente Ferdinand Marcos; siya asin an kairiba, naradas dawa ngane daa guminana an saro sainda (si Eddie Alanis) dai nakatukaw ta minakis-makis an resulta sa eleksyon. An Bicol Saro, kinaptan niya bilang presidente pakatapos kan turno ni Monico Imperial, Sr. Duwang beses man siyang nagkandidato bilang Kongresista (1986 asin 1992) pero palibhasa mayong makinarya asin kwartang pantostos, maski bantog an pangaran niya, dai man giraray siya nakalusot. Sa ultimong pagkandidato niya, an duwang kalaban niya iyo si Celso Baguio asin si Pol San Buenaventura kun saen si Baguio an guminana.

Kan mga enot na taon, siya nagin man provincial administrator (1960-1967) ni Gobernador Apolonio Maleniza. -

Kan an Balalong matogdas (1977), siya an pinakaenot na kinua ni Juan Triviño, na iyo an kagsadiri kaini, bilang editor hanggan taon 1983. Dangan kan taon 1983, siya nagbutas na bilang editor asin nagsalida nang editor saiya iyo si Nonong Triviño, aki ni Juan Triviño. Alagad siya nakaisip magpundar man kan peryodikong Handiong (Oktobre 1983) asin pinakaenot na luwas kaini pinaimprenta sa Superprint na pagsasadiri kan Naga College Foundation. Pero an nagsurunod na luwas hanggan ini nagtiklop kan Desyembre 1997, pinapaimprenta na niya ini sa Imprenta Bicolana gibo kan an imprentahan na ini kontratado na saiya asin siya na mismo an nagpapadalan kan negosyo kaini sa rentang Php 10,000.00 an bulan. Siya nagkapot kan imprentahan poon 1988 sundo' 1995.

Siya nagin man provincial administrator (1995-1999) asin konsultant (2000-2001) ni Luis Villafuerte kan ini gobernador sa duwa niyang huring termino.

Masabi pa, saro siya sa pinakulong tolos ni Marcos sa Kampo Canuto sa Pili, Camarines Sur kan Nobyembre 1972 asin kairiba niya duman sa Abogado Antonio Carpio, Ramon Tolaram. Luis General, Jr. asin iba pang peryodista kan ibinaba an Ley Militar ni Marcos, mala ta an mga kliyente niya duman na nagkokonsulta saiya sa preso.

Sa pag'oltan kan saiyang mga kasibotan, nakua niya pang magtokdo nin Ingles sa Unibersidad kan Nueva Caceres.

Siya nagadan sa edad na 77 huli sa colon caner asin ilinubong sa kamposanto kan Eternal Gardens sa Bgy. Balatas, syudad kan Naga.

Mga panluwas na takod

• Kaso dapit ki Abogado Tria
• Nagpirma sa Roll of Attorneys Marso 26, 1962 (Roll No. 17481)