Sinulog

Sinulog
	Pagbayle sagkod pagkulkol sa Banal na Aking si Hesus, na bistado man bilang Santo Niño
Opisyal na pangaran	Sinulog-Santo Niño Festival
Inaapod man na	Sinulog
Pigseselebrar kan	Syudad nin Cebu
Klase	Relihiyoso / Kultural
Petsa	Ikatolong Domingo nin Enero

An Sinulog, inaapod man na Kapistahang Sinulog-Santo Niño, sarong taunang kultural asin relihiyosong kapistahan kada ikatolong Domingo kan Enero sa Syudad nin Cebu, sagkod sa ikaapat na Domingo kan Enero sa Carmen, Cebu. Ini an pigbibistong sentro kan Katolikong selebrasyon para ki Santo Niño sa bilog na Filipinas.

An kapistahan pigkonsidera bilang inot asin Reyna kan mga kapistahan sa Filipinas, kun sain an kada selebrasyon kan kapistahan nakakaguno nin saro(1) hasta duwang(2) milyon na katawo gikan sa bilog na nasyun.^[1] Luwas sa relihiyosong aspeto kan kapistahan, an Sinulog bisto man sa mga pag-orogma kaini sa kalye, na harus nangyayari sa banggi bago asin sa mismong banggi kan panginot na kasibotan nin kapistahan.^[2]

An iba pang lugar arug kan Syudad nin Kabankalan, Syudad nin Maasin, Balingasag Misamis Oriental, Syudad nin Cagayan de Oro, Syudad nin Butuan, sagkod Syudad nin Pagadian iyo igwa man nin sadiri nindang bersyon kan kapistahan na minatao nin onra sa Santo Niño.

Etimolohiya

An taramong Sinulog gikan sa Cebuanong taramon na sulog na may kahulugan na "garu paghiro kan tubig", na iyo nagtataong deskripsyon sa atras-abanteng paghiro sa bayleng Sinulog. An bayle, may duwang lakdang paabante sagkod sarong lakdang paatras, na piggigibo sa tanog nin mga drum. An pagbayle pigkakategorar bilang nakabase sa Sinulog, talingkas na interpretasyon, sagkod baraylehan sa kalye. An mga paratinda nin kandila sa Basilika padagos man an pagbayle sa tradisyunal na bersyon kan bayle kapag nagsusulo nin kandila para sa saiyang pigbebentahan, kaiba man kaini an mga awit sa katutubong lenggwahe.

Uusipon

Kaidtong Marso 16, 1521, an Portuguese na si Ferdinand Magellan nag-abot sagkod nagtanom nin krus sa baybayon nin Cebu, asin saiya man na pig-ako an teritorya para sa Espanya. Saiyang pigpresenta an imahe kan Aking si Hesus ki Rajah Humabon. Si Hara Humamay (o Amihan sa ibang mga bersyon) iyo nagribay nin ngaran, Reyna Juana pagkatapos ki Juana, an ina ni Carlos I. Kaiba an iba pang pamayo kan isla, mga 800 na katutubo an nag-ako sa pagtubod na Romano Katoliko.

An kasibotan an harus ginibong basehan para sa mga bayleng Sinulog, na nag-aakto sa pag-abot kan mga Kastila sagkod an presentasyon kan Santo Niño sa Reyna. Sarong popular na tema sa mga bayleng Sinulog iyo an si Reyna Juana nagkukulkol nin Santo Niño sa saiyang mga takyag asin piggagamit ini sa pagtao nin pagpapala sa saiyang mga katawohan na igwang kahelangan na pinagtutubudang gibo nin mga demonyo asin maraot na espiritu.

An mga lakdang sa bayleng Sinulog iyo pinagtutubudang hale sa adbiso ni Baladhay ki Rajah Humabon. Ini iyo nangyari sa paghelang ni Baladhay na ikinamundo ni Humabon. Nagsugo si Humabon sa saiyang katutubong tribo na darahon si Baladhay sa sarong kwarto kun sain an Santo Niño ikinaad, kaiba pa an ibang mga paganong diyos kan mga katutubong Cebuano. Nagtapos an pirang mga aldaw, si Baladhay nadangog na nagkukurahaw asin biyong nagbabayle. Si Baladhay pighapot kun tano siya namata asin biyong nagkukurahaw. Pigtukdo niya an imahe ni Santo Niño, kun sain pigeras niya na nakahiling siya nin sadit na aki sa ibabaw niya na nagpoporbar magmata saiya sagkod pigkikitik siya gamit an dahon nin niyog. Sa pagkabigla niya, pigtakot niya an aki gamit an pagkurahaw. An sadit na aki nagbuhat asin nagpuon sugutan si Baladhay. Bilang balos, si Baladhay nagbayle kaiba an sadit na aki asin nagtaram na an saiyang pagbayle iyo pag-arug niya an paghiro kan salog. Sa ngunyan, an duwang-lakdang paabante, sarong lakdang paatras na paghiro iyo piggagamit man giraray kan mga paratubod sa Santo Niño, na nagtutubod na pasya kan Santo Niño na magkaigwa nin pagbayle si Baladhay.

Selebrasyon

An escudo de armas bilang parte kan tatak nin Sinulog

Tatak

An Cebu City Historical Committee iyo an responsable para sa konseptwalisasyon kan Sinulog bilang sarong probinsyal na kasibotan, asin nagdesisyon sa paghimo nin tatak para sa Sinulog ngarig magin saro na ining institusyonal na taunang kasibotan. Piggamit ninda an escudo de armas kan Santo Niño na binabalehan nin duwang-payo na halkon na iyong marka kan namamayong House of Habsburg sa Europa. An simbolo iyo nagrerepresenta sa kambal na obheto kan dinastiyang Habsburg bilang "Kampeon kan Katolisismo asin Tagabusol nin Pagtubod." Sa oras kan an Espanya nagpadara nin ekspedisyon sa Filipinas, yaon sinda sa irarom kan dinastiyang Habsburg. An komitiba napagtanto na an paggamit sa imahe nin Santo Niño bilang parte kan tatak iyo sarong maraot na kagamitan sa sarong banal na bagay.^[3]

An komitiba kan Sinulog dagos na pigkaag an duwang-payo na halkon sa katutubong armas. An katutubong armas iyo nagsisimbolo kan resistensya kan mga Filipino sa kolonisasyon mientras an escudo de armas ni Santo Niño's na naka-imprinta digdi iyo nagrerepresenta sa pag-ako sa Romano Katolisismo kan bilog na nasyun.