Saringsing National Writers Workshop
An Saringsing National Writers Workshop (itinugdas bilang Saringsing Writers Workshop asin inapod Saringsing Bikol Writers Workshop kan 2019) sarong taonan na workshop para sa mga nagpopoon na magsurat nin rawitdawit, usipon, saysay asin drama pang-entablado sa Filipinas. Pinapadalagan ini kan organisasyon nin Parasurat Bikolnon na nakagamot sa Syudad nin Naga, Camarines Sur katuwang kan mga lokal na gobyerno asin manlainlain na institusyon asin organisasyon sa rehiyon. Ginigibo ini tuyong bulan nin Abril o Disyembre maliban kan 2013 kun sain ginibo ini sa bulan nin Pebrero sa bulan nin arte.[1]
| Saringsing National Writers Workshop | |
|---|---|
| Kamugtakan | Aktibo |
| Genre | Kumperensya |
| Kalakawan | Taonan |
| Lugar | Manlainlain |
| Kinamumugtakan | • Syudad nin Naga (2011, 2013, 2016) • Pili, Camarines Sur (2012, 2015) • CBSUA-Pili, Camarines Sur (2014) • NCF asin Pasacao, Camarines Sur (2017) • Buhi, Camarines Sur (2018) • Virac, Catanduanes (2019) • Calabanga, Camarines Sur (2021) • Canaman, Camarines Sur (2023) |
| Pinonan | 2011 |
| Kagtugdas | Buboy Aguay, asin iba pa |
| Mga partisipante | Mga Bikolanong parasurat |
| Aktibidad | Hunglonan nin pagsurat |
| Inorganisar kan | Parasurat Bikolnon |
Agi-agi kan hunglonan nin pagsurat
baguhonKaamayan
baguhon
An hunglonan nin pagsurat o workshop nagpoon bilang sarong impormal na riribayan nin tuyaw sa bàgong haman na mga rawitdawit kan myembro kan organisasyon. Ginibo ini kan Abril 27, 2011 sa Syudad nin Naga kun sain nagin kritiko si Jason Chancoco asin Jay Salvosa. Nasundan ini kan Marso 18-19 kan sumunod na taon sa Pili, Camarines Sur kun sain mga rawitdawit kan anom (6) na myembro kan organisasyon an isinalang para sa kritika. Nagin panelista man digdi si Bernardo Miguel Aguay Jr., Marissa Redburn asin Francisco Penones, Jr.
Sa pakikipagtabangan kan lokal na gobyerno kan Syudad nin Naga ginibo an ika-3ng Saringsing Writers Workshop sa Naga City Hall bilang parte kan selebrasyon kan Bikol Arts Festival. Binuksan sa publiko an pag-akò nin mga partisipante kun sain kagduwang (12) katood na mga parasurat o fellows an napilì para tulong-aldaw na hunglonan sa rawitdawit, rawitdawit pan-akì, halìpot na usipon, asin usipon na pan-akì.[2] Nagin tagapagtaram sa workshop si Gabriel Bordado. Tuminukaw poon kan taon na ini bilang mga kritiko si Elbert Baeta, Jerome Hipolito, Eilyn Nidea, asin Irmina Torres kaiba an mga dating panelista.
Sinundan an hunglonan nin pagsurat kan Desyembre 21-23, 2014 na ginibo sa Sentral na Bikolnon na Unibersidad nin Estado kan Agrikultura (CBSUA) sa Pili, Camarines Sur. Ini an inot na pagkakataon na ginibo an aktibidad sa huring parte kan taon. Kagsarô (11) sa mga aplikante an napilì kun sain isinalang para sa kritika an mga rawitdawit asin halìpot na usipon sa mga tataramon na Bikol Sentral, Rinconada Bikol, Bikol Sulnopan na Albay asin Masbatenyo. Nagin katuwang kan organisasyon an Association of Student Grants-in-Aid for Poverty Alleviation (ASGP-PA), Philippine Rural Reconstruction Youth Association (PRRYA) asin an CBSUA. Kabali sa mga katood na parasurat si Digna Ruth C. Davila na nakabase sa Iloilo alagad tubong Magarao, Camarines Sur, asin Ma. Cecilia C. Dela Rosa na nakabase sa Manila alagad tubong Syudad nin Naga.[3]
Tulos na sinundan an workshop sa orihinal na bulan nin Abril asin liwat ining ginibo sa Palestina, Pili, Camarines Sur. Nainot nang ipig-anunsyo na gigibohon sa CBSUA-Pili Main an workshop alagad nasulô an edipisyo kun sain kutâ gigibohon an aktibidad. An duwang aldaw na hunglonan sa pagsurat itinaon sa ikalimang anibersaryo kan organisasyon.[4]
Ginibo an ikaanom na taon kan workshop sa Raul S. Roco Library kan Abril 15-17, 2016. Sa taon na ini, idinugang sa mga kategorya an rikas-usipon, asin dakitaramon o pagpalis sa arin man na tataramon na Bikol nin rawitdawit o halìpot na usipon na isinurat nin sarong lokal o dayuhan.[5][6] Duwanpulong (20) katood na parasurat an nagpartisipar sa workshop kabali si Emmanuel Barrameda na akì nin sarong Tagalog asin Bikolano. Siya nakabase sa Cavite alagad igwang ugat sa Catanduanes.
Pasiring sa pagigin nasyunal na workshop
baguhonKan 2017-2018, pinahiwas an pag-ako nin aplikante asin binuksan bako sana sa mga parasurat sa rehiyon an sasarong pangrehiyon na workshop para sa pagsurat nin literaturang Bikolnon. Sa pinakainot na edisyon kaini bilang sarong national workshop, sampulong (10) mga katood na parasurat an nakatapos sa apat na aldaw na aktibidad kabali si Fernando C. Chavez kan Syudad nin Las Piñas na guminikan sa banwaan nin Garchitorena, Camarines Sur. Binuksan an programa sa Kolehiyong Fundasyon nin Naga, asin ginibo an kabilogan sagkod pagtapos sa Que Pasacao beach resort sa bayabayon kan Pasacao, Camarines Sur.[7] Nagin katuwang kan organisasyon an opisina ni representante Gabriel Bordado kan tercer distrito kan Camarines Sur asin opisina ni alkalde John Bongat kan Syudad nin Naga.
Dara an ngaran na Saringsing National Writers Workshop, dinara sa banwaan nin Buhi, Camarines Sur an workshop na pinanginotan ni Ryan Cuatrona bilang tagapadalagan kan hunglonan. Ginibo ini poon Abril 14 hanggan 17, 2018.[8] Huli sa suhestyon ni Peñones tanganing makakua nin suporta hali sa Nasyunal na Komisyon para sa Kultura asin kan Arte, ginamit an pangaran na Saringsing Bikol Writers Workshop. Nadagos an ikasiyam na edisyon kan workshop sa pagkikipagtabangan kan SurTe, lokal na gobyerno kan probinsya nin Catanduanes, asin iba pang mga institusyon asin mga indibidwal. Si Shellah Farina Chan iyo an nagin tagapadalagan kan taon na ini.
Kagtulo (13) sa kaglimang napiling mga katood na parasurat an nakatapos sa ikasiyam na edisyon kan hunglonan nin pagsurat.[9] Kabali sa mga ini si Mahalina J. Alanib (Bulan, Sorsogon), Albert S. Asanza (Canaman, Camarines Sur), Roxanne E. Berido (Syudad nin Naga), Engilene Cris Q. Buensalida (Calabanga, Camarines Sur), Princess Carmela P. Casa (San Jose, Camarines Sur), Ronnie N. Cerico (San Andres, Catanduanes), Alexander Yvan P. Fernandez (San Andres, Catanduanes), Jose Antonio B. Moran (Syudad nin Tabaco, Albay), Paul John C. Padilla (Virac, Catanduanes), Donna Mae N. Ramirez (Virac, Catanduanes), Roselle M. Templonuevo (Baras, Catanduanes), Dave S. Tolentino (Virac, Catanduanes), Francis B. Tolero (Caramoran, Catanduanes). Si Padilla an napiling pinakamabansay na katood kan taon na ini.
Katuwang an Central Bicol State University of Agriculture (CBSUA), ginibo an ika-sampulong Saringsing National Writers Workshop bulan nin Disyembre kan 2021 sa banwaan nin Calabanga, Camarines Sur, asin birtwal para sa mga partisipante. Nasundan liwat ini sa Canaman, Camarines Sur duwang taon an makalihis katuwang an parehong institusyon sagkod an Center for Partido Studies kan Partido State University (PSU).
Mga edisyon
baguhon| Taon | Direktor | Lugar | Partisipante |
|---|---|---|---|
| 2011 | Bernardo Miguel Aguay, Jr. | Syudad nin Naga | 3 |
| 2012 | Marissa Redburn | Palestina, Pili, Camarines Sur | 6 |
| 2013 | Digna Ruth Daliva | Syudad nin Naga | 10 |
| 2014 | Froy Beraña | CBSUA, Pili, Camarines Sur | 10 |
| 2015 | Elbert Baeta | Palestina, Pili, Camarines Sur | 5 |
| 2016 | Bernardo Miguel Aguay, Jr. | Syudad nin Naga | 20 |
| 2017 | Julius Bulahan | Pasacao, Camarines Sur | 10 |
| 2018 | Ryan Cuatrona | Buhi, Camarines Sur | 10 |
| 2019 | Shellah Chan | Virac, Catanduanes | 13 |
| 2021 | Irvin Sto. Tomas | Calabanga, Camarines Sur | 5 |
| 2023 | Edwin Breva Jr. | Canaman, Camarines Sur | 6 |
Mga panelista asin partisipante
baguhon
Nagtukaw bilang bisitang kritiko an manlainlain na parasurat arog ninda Jay Salvosa kan (2011), Jason Chancoco (2011, 2014, 2015 asin 2016) Francisco Peñones Jr. (2012-2016 asin 2018), Irmina Torres (2013-2019, maliban kan 2017), Eilyn Nidea (2013-2019 asin 2021), Eduardo Uy (2014), Bong de la Torre (2014), Jun Pesimo (2014 sagkod na magin myembro kan 2017), Estelito Jacob (2014 sagkod na magin myembro kan 2018), Rizaldy Manrique (2016 asin 2017), Emmanuel Barrameda (2017 sagkod na magin myembro kan 2018), Jovi Cadores (2018 asin 2019), Niles Breis (2018) asin Allan Popa (2019).
Kabali sa mga myembrong parasurat na nagtataong kritika iyo sinda Buboy Aguay (2011-2016 asin 2021), Jusan Misolas (2013-2018), Marissa Redburn, Elbert Baeta, Jerome Hipolito, Clinton Abilong, Ian Kenneth Orasa, Julius Bulahan, Froy Beraña asin Irvin Sto. Tomas, Adem Nalu Rubio, Napoleon Arcilla III asin Marvin Aquino.
Igwa nang siyam na pulo may duwang (92) mga parasurat an nagtapos sa Saringsing National Writers Workshop poon kan 2011-2019 asin 2021 gikan sa Albay, Camarines Sur, Camarines Norte, Catanduanes, Sorsogon, Syudad nin Iriga, Syudad nin Legazpi, Syudad nin Ligao, Masbate, Syudad nin Naga, Syudad nin Tabaco, Iloilo, asin Metro Manila.
Kataytayan nin mga ladawan
baguhon-
Mga partisipante sa Saringsing Writers Workshop 2012 -
Kagduwang (12) nakatapos sa Saringsing Writers Workshop 2013 -
Workshop kit 2014 -
Si Buboy Aguay sa Saringsing Writers Workshop 2014 -
11ng katood na parasurat kan 2018 kaiba an workshop director, alkalde Moran asin presidente kan PB -
Kagtulong (13) mga katood na parasurat kan Saringsing Bikol Writers Workshop 2019
Toltolan
baguhon- ↑ Ten fellows to 7th Saringsing Writers’ Workshop named Archived 2019-08-21 at the Wayback Machine. Bicolmail.net (pighugot 2017-5-29)
- ↑ Ika-3 Saringsing Writers Workshop: Pangapodan nin mga aplikasyon Archived 2015-04-16 at the Wayback Machine. Naga.gov.ph
- ↑ 4th Saringsing Writers Workshop fellows named Panitikan.com.ph
- ↑ 6 na partisipante sa Ika-5ng Saringsing Writers Workshop, napili Panitikan.com.ph
- ↑ Parasurat Bikolnon is now accepting entries to the 6th Saringsing Workshop Panitikan.com.ph
- ↑ Twenty fellows to the 6th Saringsing Writers Workshop named Panitikan.com.ph
- ↑ Ten fellows to 7th Saringsing Writers’ Workshop named Archived 2019-08-21 at the Wayback Machine. Bicolmail.net
- ↑ CALL FOR SUBMISSIONS: 8th Saringsing National Writers Workshop Bicol Standard (pighugot 2019-5-18)
- ↑ Saringsing Writers Workshop fellows announced Bicol Standard (pighugot 2019-05-02)
Hilnga man
baguhon
| An Wikimedia Commons igwa nin medya dapit sa Saringsing Writers Workshop. |
_(Add_Ms_29924).jpg){kind=small}
.jpg)
Sarong saringsing na artikulo ini sa Literatura. Makakatabang ka sa Bikol Wikipedia sa pagparambong kaining pahina.