Nicolas Prieto
[1]Si Nicolas V. Prieto ( Septyembre 10,1924 - (Septyembre 18. 1998) sarong Bikolanong peryodista, kolumnista, humorista asin parasurat nin mga artikulo sa Ingles.
Pamilya baguhon
Si Prieto, na inaapod kan saiyang mga amigo na "Kulas" o "Nick", napangagom si Ramona "Monita" Bartilet, sarong kolehiyalang taga-Canaman, gradwado sa Colegio de Sta. Isabel (ngonyan Universidad de Sta. Isabel na). An saindang pagsasaro nagbunga nin pitong aki: Jojo Prieto Vertido, Becky Prieto Intal, Bernadette Prieto Prego, Roberto Prieto, Nicolas, Jr., May Prieto Garrovillo, asin si Raymund Prieto.
May saro-saro siyang tugang an pangaran Marcos na nagin sarong abogado, na ngonyan nag' eerok sa La Union, sa rona' kan Ilocos.
Saro sa mga guinibong libro ang " The Best of the Beast". The of Nick V. Prieto.[2]
Personalidad asin personal na buhay baguhon
Kun maguno sa mga pagladawan saiya, sabi ni Tony Carpio, siya an "irreverent columnist, the punster inveterate..". [3]Sabi man ni Mike Julia kan Weekly Informer, si Nick Prieto ".. never held back his punches. Like ... boxer Muhammad ali, he danced like a butterfly but stung like a bee. The sidesteps inside the ring of his columns could easily duck the counterpunching of his targets, but more so, were his telling blows."[4]
Ini man an sinurat ni Mariano S. Aureus "I was telling them about you. I told them that I know of one good writer who can amuse you, who can startle you, may arouse you and he may anger you. But one thing I can assure you that he'll never bore you- and that is NICK PRIETO, a Bicolano, the great writer."[5]
Si Juan G. Frivaldo nagsurat ki Prieto sa siring na tenor: "My dear Nick: I roared in laughter when you called me in your April Oragon column "extra terrestial denizen capable of 50 push-ups on a bare mattress or mistress."[6]
Si Prieto maski kun minsan pasubang nainsulto, siya tataong maghilothilot sa ino'olog'olog niya. Masanggayang pirmi, siya maki'amigohon, buhay na buhay kun mag'istorya sarabi kan saiyang mga amigo. Siya pirming laman sa mga tiripon asin irinoman kan saiyang kapwa mga peryodista. Makusog mag'inom, alagad siya an sentro parati kan aripompon. Malatoy nanggad an tiripon pag yaon siya. Mahilig man siya magkanta orog na kan mga klasikong kundiman asin magsurat sa Ingles nin mga rawitdawit.
Karera baguhon
Sa paghanapbuhay, iba pa sa pagkamoot niya sa pagsurat (na, sabi niya, dai nagharok saiya nin dakulang pirak), nagin siyang empleyado sa munisipyo kan si Leon SA. Aureus an alkalde kan banwaan nin Naga, empleyado sa San Miguel Corporation kun saen nagin siyang "top salesman" kan mga produkto nin Coca-cola, sarong correspondent kan Philippines Herald asin dangan sarong ehekutibo sa sarong kompaniya sa seguro (insurance firm)[7]. Enot pa kaini, hubin pang maray, siya halipot na panahon nagtrabaho sa Philippine Navy.
Siya bantog na gayo bilang humorista. An mga sinusurat niya parati mapangisi, malanit kun makalatob, asin pano nin mga pagmasid na may pagolog'olog asin pagtutuya sa mga gibong kalokohan kan mga opisyales sa gobyerno o kun bako man, sa simpleng pagtuyaw sa mga kaluyahan o kabulastogan kan mga tawong saiyang nasusumpongan sa buhay. An sentido kan saiyang pagsurat hinahanap an kontradiksyon sa sitwasyon o kinakawat an paggagamit kan tataramon na an parabasa mayong ibang reaksyon kundi magharakatak o mapapusngak. Sabi kan iba, may pangwaki' o sima' an mga panaramtaram niya pero naaaling nanggad an mga parabasa. Sabi ni Francis T. Nacianceno, Jr. saiyang amigong kaugos nanggad, ".. an saiyang mga kolum nag'ani saiya nin reputasyon na (siya) may pagkapogoso sa pag'isip." asin "...an pagsurat-kolum, na iyo na an alitoktok sa libreng periodismo, iyo an sayon niyang gayo." [8] Sa saiya, sapa' niyang maray an pagsurat, sa pagsubasuba kun natuyaw asin pagkodesya sa tawo na nakangirit dawa grabe na an labod kan saiyang hinahaplagan.
Regular siyang taga-ambag sa iba-ibang peryodiko semanal sa Camarines Sur, orog na igdi sa siyudad kan Naga asin Legazpi, kolumnista siyang halawig sa Bicol Mail, kontributor sa Philippine Free Press, sa Oragon Newsmagazine, Weekly Reporter, Philippine Daily Inquirer, The Bicol Chronicle. Weekly Informer, Power Magazine, Bicol Post, Bicolspeak, Bicol News Today, Bikol Banner, Sorsogon Chronicle, Power Newsmagazine, Kislap, Black and White, Weekly Women's magazine,The Saturday Herald Magazine, The Manila Times Daily Magazine, The Phjilippines Herald, The Manila Chronicle, asin sa Kislap-GRAPHIC.
An karera niya sa pagsurat bilang peryodista, kolumnista asin feature writer naglawig nin sobrang apat na dekada, poon 1951 abot mga taon 1990. Nagpoon siyang magsurat sa Bicol Examiner, na tinogdas asin pinapalagda ni Magno Pasadilla kan mga taon 1950.
Siya nagin kaapil kan Naga Press and Radio club asin kan National Press Club.
Toltolan baguhon
- ↑ Prieto, Nick V. (2000). The Best of Nick V. Prieto.
- ↑ Nick V. Prieto January 2000 The Best of the Beast Bikol Publishing House
- ↑ Prieto, Nick. The Best- the Beast in- Nick Prieto
- ↑ Prieto.Op. it., p. vii
- ↑ Prieto. Op. cit., p. ix
- ↑ Prieto.Op. cit., p. ix
- ↑ Prieto. Op. cit., p. viii
- ↑ Foreword. TheBest-the Beast in- Nick Prieto, p.iv
Ginunoan baguhon
- The Best Of (Beast In) Nick V. Prieto. Napalagda kan saiyang pamilya sa tabang ni Francis T. Nacianceno, Jr. asin saiyang pag'iriba. Naga City. Taon 2000. 228 na boklit.
Mga panluwas na takod baguhon
- libro ni Nick V. Prieto[permanent dead link]
- Mga komentaryo ni Jose B. Perez sa mga artikulong sinurat ni Nick V. Prieto
