Juan Frivaldo

Si Juan Gallanosa Frivaldo ( 1915 - Mayo 2, 2000) sarong Filipinong pulitiko asin gerilya kan tyempo Hapon. Siya an pinakahalawig na nagtukaw bilang gobernador sa bilog na Filipinas. Walong termino siya nagkapot kan katongdan pagkagobernador (1955-1968), asin an 43 na taon na serbisyo niya mayo pang nakaarog.

Pamilya

Namundag sa Sta. Magdalena, Sorsogon, an naagom niya iyo si Maria Gabito na nagtao saiya nin kagsiyam (19) na aki.

Edukasyon

Maski tios na maray, naghingoa siyang makaadal mala ta nag'eedad na siyang 35, may pamilya na asin may limang aki, kan siya nagtapos kan kursong Batsilyer en Artes sa Literatura sa Unibersidad kan Santo Tomas kan taon 1950. An maogmang bagay ta siya nagtapos summa cum laude.

Karera

Si Frivaldo hale sa pamilyang dukha' kaya kan enot na mga panahon an pino'nan niyang trabaho komo sana sarong waiter sa Manila Hotel, dangan nagin siyang surogoon sa pamilya ni Dr. Jose S. Reyes kan Cebu City, dangan nagbalyo siya ki Pedro Reyes, manager kan Cebu Transit, bilang man giraray sarong houseboy.

Kan nakatapos siya sa pag'adal, nagin siyang peryodista asin nagtrabaho sa Manila Times asin sa Daily Mirror. Komo de prinsipyong tawo, respetadong siyang maray bilang sarong peryodista. Sinasabing mahigoson siya sa paghanap asin pagsurat nin bareta.

Alagad mas amay pa kaini, panahon nanggad nin Ika-2 Gerang Pangkinaban, siya nagin gerilya asin siya nag'operar sa kakadlagan kan Santa Magdalena, Sorsogon y siya an nagtataong bareta gamit an sarong tinatago-tago na radio transmitter. Siya pa an natokahan na editor kan peryodikong, The Emancipator, an peryodiko kan si mga gerilya. Tolong taon kadto na siya aktibo sa lindong kan Escudero Guerilla Unit.

Karera sa pulitika

Paglaog niya sa pulitika, makangalas an rekord niya ta apat siyang beses guminana bilang kandidato para gubernador apesar ngane mayo siyang makinarya asin kwartang pantostos. Mala ta nakaantos siya sa walong termino, 43 na taon na pagsirbe sa banwaan, na pirmi siyang may boto na baya' na maray an kalaban. Popular na gayo siya sa mga kahimanwa nin huli ta simple siyang tawo, bakong korupto asin odok sa boot an pagsirbe sa banwaan.

Kan siya nagadan kan Mayo 2, 2000, siya mayong winalat na yaman asin pobre man giraray, mayaman sana sa respeto asin pag'onra kan mga kabanwa niya ta nahiling sa saiya an tunay na serbidor asin lider na panalmingan nanggad nin sarong toltol na pulitikong may pagkamoot sa sakop niya.

Sabi kan makuapo niyang si Vladimir Ramon Frivaldo, an lolo niya an pinakapobre sa mga nagin gobernador sa Sorsogon asin mayo ngane nakapaharong sa Sorsogon, mala ngane daa ta si harong na inutang sa GSIS na'embargo pa kan ahensya. Dagdag pa niya, ni sarong jeep o kotse dai nakabakal an lolo niya kaya pirmi sanang nalunad sa pampasaherong jeep kun naopisina.

Mga panluwas na takod

• Desisyon kan Korte sa Pagmandong Maninigo na Tumukaw si Frivaldo bilang Gobernador