Museo del Seminario Conciliar de Nueva Caceres

An Museo del Seminario Conciliar de Nueva Caceres sarong museo eklesiyastiko na tinogdas kan Simbahan katoliko kan taon 1997. Ini namomogtak sa Seminario Conciliar de Nueva Caceres igdi sa syudad nin Naga. Mayormente, an museo naglalaman nin eksibit kan mga relikyas kan simbahan arog kan mga lumang gubing kan kapadian, mga gamit sa pagmisa arog kan kalis, biblia, mga memorabilia kan mga obispo, lumang rekord kan mga nag'adal sa seminario na mga bantogan na Filipino arog ki Jorge Barlin, Jose Maria Panganiban, asin iba pa; parte kan edipisyo kan mga simbahan sa iba-ibang banwaan asin mga rebulto nin mga santo. Igwa man igdi nin ilustrasyon kan pasurunodsunod kan mga obispo na nagtukaw sa diocesis kan Caceres.

Igwa man ini nin katakin na seksyon na nagtatampok kan mga pre-Hispanikong artifak asin relikyas kan lumang panahon arog kan mga tapayan na lubongan, mga dulay, pitsel, mangko asin plato hale sa Antigong Tsina, mga soanoy na gamit kan mga preHispanikong Bikolnon, mga dulay na sarayan kan mga restos. May natipon man igdi nin mga hikaw, kalumbiga, singsing asin pasak sa ngipon na gibo sa bulawan asin mga pan'ornamento sa hawak na gibo hale sa gading. Haros gabos kan mga ini parte kan kuleksyon ni Ermelo Almeda na iwinalat asin ipinasubli sa museo. Yaon man igdi nasaray an Lokdo nin Libmanan, parte kan kuleksyon ni Almeda asin artifak na nagin sentro kan adal ni Zeus Salazar sa libro niyang Liktao at Epiko (2004).

Si Fabiana Arejola an namamahala sa museo.