Hambura

An hamburâ sarong lutò nin gulay arog kan balatong, ugbos kamote, talong (biringhinas), ugbos kangkong, okra, asbp.

Ini binababaw sa pigsasapna'. Kaya, masasabi ining mga padalian na pagkakan. Ngonyan na moderno na, pwede syempre maghambura' sa steamer. Basta an pagpalomoy asin pagpaluto kaini paagi sa pagkulong sa laog nin lutoan na nagaalomoom sa laog asin an alintoto mismo na naloloom iyo an naluto saiya.

Pirmi, pag nakaluwag na idinodogdog ini sa tawyo na pinirisan lemonsito (suwa') o sa balaw o bagoong.

An katagang "hambura'" natala' sa lumaon na diksyonaryong sinurat ni Marcos de Lisboa, Vocabulario de la Lengua Bicol (1865) alagad iba an kahulogan kaini:

p. 165 HAMBORA' HACER UN CALDILLO CON AGUA SAL, Y LIMON Y CHILE CUANDO NO TIENEN PESCADO PARA COMER LA MORISQUETA.

Igdi boot sabihon sabaw sana na pantimpla sa maluto' kun mayong gayong sira na panira', asin an sabaw na ini pigtawan namit ta inasinan, pinirisan suwa' saka pigrunutan sili. An sinasabing "sabaw" posible iyo mansana an binsa' kan sinasapna'.