An Balikogkog sa Halonan an tinokdang rawitdawit ni Lorenzo Rosales (Siling Layas) na pinaluwas niya man sa kolum niyang Piltik na Malanit, sa Sanghiran Nin Bikol:

BALIKOGKOG SA HALONAN Dolot ki P. Eustaquio Revatoris)


Maraot na pagtagahan
an balikogkog na helang
orog na sa mga gurang
na saradit an halonan.


Tanganing tomobod kamo
hapta si Don Casimiro
kon baga ngane totoo
na napa'dokan si TIQUIO.


Siya daa napa'dokan
Kan ba'gong ABIKIDIHAN
na digdi sa Naga ngonyan
pigmokna' kaning SANGHIRAN.


Ta napalatoka' daa
kan mga "K" paggamita
kaya kan Sabadong aga
nagdigwa' sa BICOLANDIA.


Si MAMO' TIQUIO herak man!
kon baga totoo iyan
na sa saiyang pagkakan
an "K" dai natutunaw.


An marhay kani luha ko
na ibulong ta ki TIQUIO
igibo siyang SAMPURADO
kan letrang "C" o letrang "Q".


Saka padarahan ta man
idtong ibang mga gurang
na Cura duman sa albay
ta giridkanon nang marhay.


Taplakan sindang padagos
nin "Cantarida" sa liog
nganing mahale' an girok
diyan sa saindang yokyok.


Ta an pag'gaom kan Naga
nagka-girirokan sana
huling ining SANGHIRAN ta
gibong "iba" bakong "ninda".


Kon igwa man sa Sorsogon
nin mga maoorihon
igulay sindang langatong
bangotan bading olodon.


Saka sabihan si Iroy
si Mamo' TIQUIO purgahon
nin tagok "biga'" o natong
o nin Aceite de Castor.


Ini an dolot na la'bas
sa mga maoring kalag
ta'we nindong pasalamat
si gurang na SILING LAYAS!


Nota: Si TIQUIO sarong padi, si Padre Eutiquio Revatoris na kan mga taon 1927 Kura Paroko kan Oas, Albay. Si "Iroy" saka an "Don Casimiro" na nasasambit niya igdi iyo si Don Casimiro Perfecto. Kinaagan nin titulong "Balikogkog Sa Halonan" an saiyang rawitdawit sa itaas ta mayo siyang itinakod na kangaranan. Totoo maliwanag na pigtatalayop niya igdi si P. Revatoris bilang sarong pangisi sana man.

An "Bicolandia" na binanggit ni Rosales igdi iyo idtong peryodikong semanal na pinapalagda' asin pagsasadiri ni Juan San Agustin, posible nagluwas sa periodong 1927 abot 1932. Bikol asin Kastila an ginamit na lenggwahe.

Ginunoan baguhon