Aida Cirujales

Si Aida Brosas Cirujales (namundag kan Hunyo 5, 1952 sa Tiwi, Albay) sarong retiradong Bikolanang paratukdô sa pampublikong eskwelahan, asin parasurat nin mga tigsik, rawitdawit, balagtasan, mga talumpati asin liriko nin kanta. Siya minimidbid na Tigsik Queen sa Camarines Sur asin iyo an kagsurat kan librong Tigsik (2008) na ipinublikar kan Nasyunal na Komisyon para sa Kultura asin kan Arte (NCCA). Nag-eerok siya sa Syudad nin Naga asin nagtukdô sagkod na magretiro sa Gainza Central School.

Aida Brosas Cirujales
Si Cirujales kan 2019
Minundagan	Tiwi, Albay, Albay
Kasibotan	Retiradong paratukdo, parasurat
Nasyunalidad	Filipino
Lahì	Bikolano
Genre	Tigsik
Bantog na gibo	Tigsik (NCCA, 2008)

Nagin siyang pinalista sa Premio Tomas Arejola para sa Literaturang Bikolnon kan taon 2007. Nagin parasurat nin tigsik sa Bikol Daily, asin Bicol Mail, nadangog man an saiyang mga rawitdawit sa programang "Sa Pagtabang Sana" sa DZGE sa Canaman, Camarines Sur, asin debate sa programang "Taragboan" sa parehong istasyon.

Kagsurat siya kan himno munisipal kan Gainza asin Tanog Mo, Tanog Ko (2017). Myembro siya kan Sumaro Bikolnon, sarong organisasyong pangkultura sa Camarines Sur asin kan Parasurat Bikolnon, sarong organisasyon nin mga parasurat sa rehiyon Bikol.

Kataytayan nin ladawan

• 
  Si Cirujales kan 2008 kan pagbungsod kan Tigsik sa Avenue Square
• 
  Si Cirujales kan pagbungsod kan saiyang librong Tanog Mo, Tanog Ko (2017) sa Raul S. Roco Library
• 
  Kopya kan librong Tanog Mo, Tanog Ko (2017)
• 
  Intrebista kan TV Patrol Bicol durante kan Buklat Art and Book Expo 2018 sa Syudad nin Naga
• 
  Si Cirujales sa pagbungsod kan librong Ginisang Poesia ni Irvin Sto. Tomas kan 2021