Miraya Bikol

An Miraya Bikol sarô sa mga tataramon na Bikol na tinataram sa probinsya nin Albay, Filipinas. Susog sa Summer Institute of Linguistics, igwa ining haros 300,000 na parataram kan 2009 sa mga banwaan nin Guinobatan, Camalig, Daraga asin Jovellar, Albay; sagkod Donsol, Sorsogon. Igwa man ining nagkapirang diyalekto na nagkakairiba-iba sa lambang banwaan. Nakakaagid an tataramon sa West Albay Bikol.

Sakop kan tataramon na Miraya Bikol sa pagtaraid na banwaan kan Daraga, Albay

Ini an ikaduwa sa pinakadakol na parataram sa mga tataramon na Bikol sunod sa Bikol Sentral. Kabali ini sa grupo nin mga tataramon sa Kadagaan na Bikol sagkod an Rinconada Bikol, Mt. Iriga Agta, Buhi Bikol, Libon Bikol asin West Albay Bikol.

Literatura

Mayo nin ipinapamugtak na pamantayan o estandarteng diyalekto an tataramon huli sa limitadong gamit kan tataramon asin nakasurat na literatura.

Nagkapirang mga rawitdawit an nakasurat sa tataramon na ini siring kan mga panurat ni Marne Kilates kan Daraga, Albay sa diyalektong Daragueño. Sa duwang antolohiyang Kalapakapa: mga Rawitdawit na pinakarhay ni Eduardo Uy, mababasa man an nagkapirang rawitdawit sa manlainlain na diyalekto kan Miraya Bikol.

Sarong halimbawa nin halipot na usipon na nakapalis sa diyalektong Camalig iyo an "An Guryon" ni Joey Napay kan Kirangay, Camalig, Albay. An sarong halimbawa nin suanoy na kasabihan sa diyalektong Daragueño iyo an "Su indi tataw makarumdom nung ginitan, indi makaabot sa adunan."

Numero

Nakasurat sa baba an mga numero sa Miraya Bikol.

Numero	Miraya Bikol	Bikol Sentral
1	üsad	saro
2	duwa	duwa
3	tolo	tolo
4	üpat	apat
5	lima	lima
6	ünüm	anom
7	pito	pito
8	walo	walo
9	siyam	siyam
10	sampulô	sampulô

Halimbawa

Ini an palis kan Juan 3:16 sa Miraya Bikol.

Dail ta namot maray ang Diyos sa kinaban, kaya itinaw nya ang solo-solo nyang akus, tabing ang sayman na manubod sanya ay indi mapamak, kung di magkayu ning bway na urang katapusan.

Hihilngan

• Eduardo Uy. Kalapakapa: mga Rawitdawit 2. Bicol University, College of Arts and Letters. Syudad nin Legazpi (2011)
• Eduardo Uy. Kalapakapa: mga Rawitdawit. ARC Press. Syudad nin Legazpi (2010)

Mga panluwas na takod

• Miraya Bikol sa Ethnologue
• Bikol, Miraya in Philippines sa Project Josua