Simbahan nin San Francisco
An Simbahan nin San Francisco namumugtak sa Syudad nin Naga, sa gilid kan Salog Naga asin kahampang kan parke nin Quince Martires. Ini mismo naghahanggilid sa Kalye Penafrancia Avenue.
.jpg)
An Simbahan tinugdas kan taon 1578 kan mga prayle kan Orden nin Fanciscano asin iyo ini an pinakaenot na simbahan sa rona' nin Bicol. An pinakaenot na pading Frayle nagkapot kan simbahan iyo si Fray Geronimo de Aguilar. Kan 1883, pinadakula an simbahan ni Fray Gregorio Salinas, dangan kan 1897 pinagayon ni Fray Mariano Camunas.[1] Kan 1915, sinasabing an simbahan naraot asin nagaba' alagad bakong malinaw kun huli sa bagyo, linog o sulo. Kan panahon na an obispo iyo si John Bernard MacGinley (nagtukaw, 2 Abril 1910 - 24 Marso 1924)[2], an rugbang simbahan pati na enterong lote, ipinabakal sa sarong komersyanteng Intsik sa halagang Php 7,500 sa rason na nagturu-tikapo an dioseses. Alagad, an simbahan kaiba lote kaini, nabawing nabakal ni Obispo Francisco Reyes sa menos presyong Php 4,000 sa kagbakal na Tsino.[3] Kan 1945, parte kan simbahan narugba' gibo kan nahulogan mga bomba resulta kan ralaban kan Ikaduwang Gerang Pankinaban,[4][5] Kan dai pa ini nasusulit bilang simbahan ini ginibong sinehan (Cine Zita) asin nagin pa ngani daang molino. An rugbang Simbahan pinaghirahay asin pinagsulit bilang sarong tunay na edipsiyong simbahan kan 1957 para sa serbisyo kan arkidiocesis.[6]
Pailihan kan mga Kastila kan 1898 baguhon
An simbahan man na ini nagin pailihan kan mga Kastila kan nagputok an Pag'alsa kan mga Gwardiya Sibil sa Nueva Caceres. Sobra sa 400 na mga Kastila patin na si Gobernador Vicente Zaidin asin si Pamayo kan Gwardya Sibil na si Don Carmelo Navarro an nagtarago igdi sa kumbento kan simbahan hasta sinda napiritan magsuruko kan Septyembre 18, 1898 sa mga rebeldeng pinamayohan na kabo Elias Angeles asin Felix Plazo, ta mayo naman sindang piglalaoman na maayuda saindang pwersa haleng Manila ta duman nasisibot na Gobyernong Kastila paglaban sa nagsasakyadang pwersa nin mga Amerikano.[7]
Toltolan baguhon
- ↑ 1950 Marker kan Simbahan San Francisco. Nasasaray sa Museo kan Unibersid de Nueva Caceres. Kinua 2023-23-23.
- ↑ https://www.catholic-hierarchy.org/diocese/dccrs.html. Kinua 10-02-22.
- ↑ Abella, Domingo. Bikol Annals Vol. 1. p 211-217, 303, 1954. Kinua 10-02-22.
- ↑ 1972 Marker kan National Historical Committee sa kampanaryong luma. Kinua 2023-12-17.
- ↑ Abella, Domingo. Bikol Annals Vol. 1. p 211-217, 303, 1954. Kinua 10-02-22.
- ↑ 1972 Marker kan National Historical Committee sa kampanaryong luma. Kinua 2023-12-17.
- ↑ Obias, Fernando Jose. INA on the record, p. 27. AMS Press. 1999.Kinua 10-04-22.
