Romulo Kintanar

Si Romulo"Rolly" Kintanar sarong Filipinong rebelde na kaapil dati sa New Peoples Army asin nagin pamayo kan General Command kaini.Si Kintanar iyo an pigtutubod na arkitekto o kagmukna kan inapod na NPA Sparrow Unit na imbwelto sa urban guerilla warfare.

Edukasyon

Si Kintanar, aki nin sarong abogado, nag'aadal nin civil engineering sa University of San Carlos, sa Siyudad nin Cebu bago siya nag'apil sa New People's Army.

Bilang NPA

Si Kintanar saro sa nagin pang estudyante ni Victor Corpus kan siya naglaog sa rebelyon. Siya nagin pamayo kan Military Commission kan NPA bago siya naaresto kan 1988, asin pamayo man kan CPP Mindanao Commission kaamayi kan mga 1980.

Siya pinatalsik sa organisasyon, kasarabay sa Ricardo Reyes asin Filemon Lagman kan taon 1992 huli sa internal na diringkilan asin saboot mga nagibong mga krimen. Si Kintanar iyo an pigtutubod na arkitekto kan NPA Sparrow Unit na imbwelto sa urban guerilla warfare asin ginibo niyang laboratoryo an Syudad nin Davao sa paghasok nin terorismo paagi paggadan sa mga opisyales lokal, mga kapulisan asin mga personahe militar.

Pagkadakop

Si Kintanar nasikop kan Marso 29, 1988 sa aldaw na gayo kan ika-29 anibersaryo kan pwersa rebelde na kan taon na idto nagbibilang nang 25,000 katawo. Sabi kan militar saro siya sa 7 "dakulang sira" kan NPA na natuklo' kan taon na idto. Alagad, walong bulan pakadakop saiya, si Kintanar nakadulag sa kun anong paagi. Kan taon 1991, Agosto 5 siya asin saiyang agom na si Gloria Jopson natuklo' ulit sa laog kan Makati Medical Center.

Pagtalikod sa NPA, pagtrabaho sa gobyerno

Si Kintanar pakadakop saiya otro, nagtalikod na sa saiyang mga kairiba sa rebelyon kan 1992 kan siya pinalibre na. Siya nagtugdas nin kooperatiba, nagin Security consultant sa Bureau of Immigration panahon ni Andrea Domingo asin sa National Electrification Administration; nagtabang sa mga politiko manggana sa eleksyon.

Pagkagadan

An Partido Komunista nin Filipinas pigkumpirma kan Enero 26 na sinda an nagpabadil-gadan ki Kintanar kan Enero 23, 2003 mantang ini nagpapangodto sa sarong restoran sa Siyudad nin Quezon. Apat katawo may bitbit 9-MM na pistola an tuyong nag'abang saiya. Gadan na si Kintanar kan idinalagan sa Est Avenue Medical Center. Edad niya kan siya binawian-buhay 52.

Mga "krimen" ni Kintanar

Sabi kan Partido Komunista, si Kintanar pigsentensyahan ninda nin kagadanan huli sa mga magabat na mga "krimen" nagibo kaini siring kan, 1. pagbungsod nin kidnap-for-ransom , pagholdup sa bangko, asin paglaog sa dollar-counterfeiting na mga operasyon kan ini yaon pa sa laog kan Partido. Sabi kan tagataram kan Partido na si Gregorio Rosal sarong maliwanag na kidnapping ginibo kaini iyo idtong pagdukot kan grupo ni Kintanar kan si negosyanteng Hapon na si Noboyuki Wakaoji kan 1986 asin kan si kagrogaring kan Bombo Radyo Philippines na si Roger Florete kan taon 1989 kun saen daa si Kintanar asin mga tauhan niya naghakot nin $10 milyon sa ransom. Akusado pa si Kintanar pagsulmok nin kanigoan na pondo kan Partido asin paghingowa na magkabaranga' asin marapak an hiron kan rebolusyon. Dugang pa ni Rosal, si Kintanar, nagaasiste sa mga "counter-insurgency operations" kan gobyerno urog pa ta aram-aram niya an internal na operasyon kan mga rebelde. An tunay na trabaho ni Kintanar, sabi ni Rosal, iyo an magin "consultant" kan AFP asin PNP.