Pinagrok

An pinagrok sarong lutong Bikolnon haros siring sa inon-on. An dakulang kaibahan lang iyo ta an sirâ (puyo an masiram pagrokon) dai hinihinulakan.

Puyo, sarong klase kan sira na ginagamit sa pag luto nin pinagrok

Pag-andam asin pagluto

An mga sira kinakaag sa kaserola asin ginogògò sa asin. Kun sarong kilo an puyo halimbawa, mga saro kaapatan (1/4) man na kilong asin an ikaag. Gògoon na marhay sagkod na sa huna mo nagtukal na an halnas saka langsî kan sirâ (rurog). Sa paggògò, nagagadan na padagos an mga sirâ.

Dangan hugasan na marhay sagkod na maglinaw an tubig. Bàgo ikaag sa kaserola, hapinan nin mga dahon adgaw saka ikaag na an mga lulutoon na sirâ. Tapos kaagan dikit na tubig. Ikaraag na an mga sangkap na rekado: bawang, sibulyas, làya, paminta asin laurel. Tapos asinan na dikit na magnamit. Kaagan nin sukà na medyo lantop sa langkaw kan mga sira. Lutoon na sagkod na maglomoy.

Popular na kultura

Ginamit ni Estelito Jacob bilang metapora sa saiyang rawitdawit na Pinagrok an proseso kan pag-andam kaini sa sarong inaabusong agom na babai na minaagi nin makuring sakit.

Mga panluwas na takod

• Pinagrok Archived 2016-08-09 at the Wayback Machine. rawitdawit ni Estelito Baylon Jacob