Bagong Hokbo nin Banwa
An Bagong Hokbo nin Banwa (Ingles: New People's Army) iyo an armadong sanga kan Partido Komunista nin Filipinas. Ini nabilog asin natogdas ni Bernabe Buscayno, na bantog sa bansag na "Kumander Dante" kan Marso 23, 1969. Ini an sinasabing grupo na nangongolekta nin "buhis rebolusyonaryo" para sa pagmantenir kan inapod kan Partido Komunista nin Filipinas na "gobyernong rebolusyonaryo nin banwa". Parati an BHB o NPA nagkokolekta nin buhis sa mga negosyong yaon sa lugar kun saen sinda nag'ooperar asin makusog. Tinatanya kan Hokbong Filipinas na an kusog kan hokbong rebelde nag'aabot 60,000 na kaapil pagsara kan taon 2015. An hokbong rebelde nagsusunod asin nag'aampoyon sa pilosopiyang Maoista.[1][2]
Sa lawig kan panahon sa pakikibaka kan organisasyon na ini, sinabi kan Hokbong Filipinas na nawara na igdi an pinagbabatayan niyang ideolohiya asin nagroro na bilang sarong pag'iriba nin mga bandido na nagpaparapantodok sa mga namamanwaan.[3]
An NPA designadong Foreign Terrorist Organization kan Departamento Estado kan Estados Unidos [4] asin designado man na grupong terorista kan EU Common Foreign and Securithy Policcy. Alagad an Filipinas hinale na sa lista nin mga teroristang organisasyon an NPA kan taon 2011 asin nagbukas naman nin urulay pankatoninongan igdi alagad an mga lakdang na ini garo mayong kinaabtan. An administrasyon ni Duterte nagdulok na sa Partido Komunista nin Filipinas para sa pagpadagos kan urulay asin pinagpaluwas sa karsel an ibang mga opisyales kaini na magigin parte kan delegasyon kan partido komunista sa pag'urulay duman sa Oslo, Norway.[5]
Kasaysayan
baguhonAn New People's Army pig-establisar kan Marso 23, 1969, pakalihis kan pagkasuruwayan kan mga paksyon ninda Lava asin Guerrero sa Partido Komunista kan Pilipinas. An mga nagin sala sa mga nakaaging dekada naghaman sa biswal na disolusyon kan PKP-1930 bilang sarong organisasyon. Igwa nin resurhensya kan mga 1960 para sa radikal na ideolohiya, katakod igdi an pagkamukna kan Kabataang Makabayan asin an pagkabantog man ni Mao Tse Tsung sa pagtalubo kan ideolohiyang Marxismo-Leninismo. Kan 1966, si Jose Maria Sison, sa gaha na Amado Guerrero suminurat kan Rectify Errors and Rebuild the Party!, sarong treatise na minatuywas sa makalumang Lavaite na pagpadalagan asin nagtau dagos nin importansya sa mga kaisipan ni Mao Tse Tsung para sa pag re-establisar.[6] Nagpadagos an iriwal hasta Disyembre 26, 1968, kan an Partido Komunista kan Pilipinas nag establisar nin mga linyang Maoista, asin igdi man nahaman an Inot na Bantog na Paghirong Rektipikasyon.
Pakalihis na ire-establisar an PKP, si Guerrero pigmukna naman an Hukbong Banwa. An mga KM kadre sa Tarlac pigkaulay si Guerrero dangan nagkonektar ki Bernabe Buscayno, dating kaapil kan Hukbong Mapagpalaya ng Bayan. Naghaman ini nin marhay na relasyon asin namukna an Bagong Hukbo nin Banwa kan Marso 29 sa pagpadagos kan dating Hukbalahap. [7][non-primary source needed] Kan panahon na idto, an NPA igwa nin nasa 60 armadong mga suldados. [8]
Tulos man na natawanan nin trabaho an NPA na mag-implementar kan programa kan CPP para sa People's Democratic Revolution. Sa Declaration of the New People's Army, pinaglista ni Amado Guerrrero an pira sa saindang mayor na mga trabaho[9]:
- An paghaman giraray kan Partido kan Bagong Hokbo nin Banwa
- An Bagong Hokbo nin Banwa dapat manginot sa rebolusyon pan-agraryo, maghaman nin mga baseng rural, asin pakusugon pa an pakikipaglaban
- An Bagong Hokbo nin Banwa dapat hamanon an National United Front
Tulos man na naglakop an NPA kasabay kan pan-organisasyon na trabaho kan CPP. Kan 1972, nakapag-establisar ini sa haros 735 na mga baryong komitiba asin dugang pang 60, asin pig-eestimar na nasa 400,000 an nasasakupan kaini na mga tawo sa bilog na nasyon.[10] Piggamit kan CPP an NPA tangani na makapagmukna nin pag-oorganisa sa mga baryo asin magkaigwa nin komitiba sa pagrerebolusyon, asin ini nagin mga instrumento sa pag-aadministrar kan rebolusyunaryong gobyerno kan mga tawo. Pigmukna an mga komitiba sa mga baryo tangani na babaan an arkila sa mga kadagaan, halion an pangangamkam, asin asiguraron an "paggadan sa mga kaiwal na tropa asin mag-eliminar sa mga panginoong maylupa, espiyang kalaban, asin man mga mararaot na elemento arog kan mga ekstorsyonista, paragadan, arsonista, asin mga kapareho." [10] Pag ini naimukna, riribayan na kaini an BOC tangani pormal na maestablisar an lugar bilang teritoryo kan rebolusyonaryong gobyerno. Kan panahon na idto, an NPA igwa nin 72 na squad asin 800 na regular na mga armadong tawo.
Suporta hale sa luwas
baguhonMay mga report na an gobyerno kan Tsina nagpapadara nin mga armas sa rebeldeng hokbo, siring kan mga nasikop na mga AK-47 na badil na daro-dara kan barkong MV Karagatan kan taon Hunyo, 1972 asin nabagat kan Hokbong Filipinas. Sinasabi man na nakakakua nin suporta an mga rebeldeng komunista sa North Korea.
Toltolan
baguhon- ↑ https://peace.home.xs4all.nl/arc/arceng/teks/thecom1i.html Archived 2013-06-19 at the Wayback Machine. Kinua 21-8-16
- ↑ http://www.philippinerevolution.net/statements/19881226_brief-review-of-the-history-of-the-communist-party-of-the-philippines Kinua 21-8-16
- ↑ http://www.gmanetwork.com/news/story/354670/news/nation/npa-guerrillas-mainly-concentrated-in-north-eastern-southern-mindanao-afp Kinua 21-8-16
- ↑ http://www.state.gov/j/ct/rls/other/des/123085.htm# Kin ua 21-8-16
- ↑ http://www.philstar.com/headlines/2016/06/15/1593250/incoming-duterte-admin-ndfp-start-preliminary-talks-oslo Kin ua 21-8-16
- ↑ Guerrero, Amado (1966). Rectify Errors and Rebuild the Party!.
- ↑ "ON NINOY AQUINO'S RELATIONS WITH CPP & NPA". josemariasison.org. October 2010. Retrieved December 4, 2019.
- ↑ Liwanag, Armando. Brief Review of the History of the CPP.
- ↑ Sison, Jose Maria (2013). "Declaration of the New People's Army". Foundation for resuming the Philippine revolution : selected writings, 1968 to 1972. ISBN 978-1-62847-920-1.
- ↑ 10.0 10.1 Guerrero, Amado (March 3, 1972). "Summing Up Our Experience After Three Years". Ang Bayan.
