MV Karagatan

An MV Karagatan iyo idtong barkong pansira na ginamit kuta kan mga elementong sinasabing hale sa gobyerno kan Tsina na nagdara kan mga armas tabang sa mga nagrerebeldeng mga myembro kan Bagong Hokbo nin Banwa (NPA). Kan Hunyo 1972, ini nasi'ripan kan sarong U-2 reconaissance plane kan gobyernong Filipinas na yaon na totoo an MV Karagatan nakaantos sa Digoyo Point sa Isabela; alagad, an sarong bersyon kan istorya iyo na igwang sarong pribadong eroplano kan sarong logging company natongod naglalayaw-layaw sa Digoyo Point, asin nata'naw sa ibaba an paghakot kan mga rebeldeng NPA nin mga armas pasiring sa pampang. An mga nakasi'rip ipigreport tolos ini sa Philippine Constabulary Command.

Nataraka an mga rebelde

An pwersa armada kan Filipinas, sa pangengenot kan Task Force Palanan sinabat an mga natarakang rebelde sa baybayon kun saen idinahik kuta an mga armas asin nagkaigwa nin maigot na enkwentro. Resulta kan laban na ini, sinasabing 200 na lang na mga badil na AK-47 an nahakot kan mga rebelde pasiring sa tagoan ninda sa Sierra Madre kan Isabela asin an dagmang na armas nagkawaralat nasikop na kan gobyerno. Segun ki Ricardo Malay, sa interbyu, an bapor may daro-darang 1,200 na M14, mga sinakong bagas, mga medikal kit, asin mga propagandang materyales regalo kan Tsina.

Si Victor Corpus, na kan Disyembre 29, 1970, iyo an nagsamsam kan mga armas sa armory kan PMA Baguio asin inubos dinara sa Isabela an mga armas nakasaray igdi, iyo an nagpaIsabela ngane ta maresibi kan kargamentong armas duman sa lugar kan Digoyo Point. Siya nagin nang kaapil sa Kabataang Makabayan asin nagkampi na sa hiron kan mga Komunista na ibagsak an gobyerno Filipino. Gibo kan pangyayaring ini, si Presidente Marcos nagdeklara asin pinari'gon sa bilog na nasyon tolostolos an ley militar.

MV Karagatan nalubog

An MV Karagatan, na dati sarong bapor na Hapones an an pangaran Kishimaru, sinasabing nalubog na sana ini gibo kan paglamasa kaini nin makusog na bagyo.,

Mga panluwas na takod

• [1] Istorya kan pagsabat kan NPA sa MV Karagatan.