Melokoton

An melokoton (Prunus persica; Ingles, peach) sarong tinanom na nagtatata', nagkakahoy asin an prutas kaini iyo pinapakinabangan na gayo, kolor giyaw kun naubakan na. Ini tal na tubo sa norte-solnopan kan Tsina, sa rona kan Tarim Basin asin kabukiran nin Kunlun Shan kun saen daa enot na pigtanom asin pinalakop.^[1]^[2]

Nabansagan ining persica huli sa lakopan na pagtatanom kaini sa Persya asin kun saen hale igdi dinara sa Europa. Sakop ini kan genus na Prunus na diyan kairiba man an mga prutas na inaapod na cherry, apricot, almond asin plum. Nabibistong gayo an melokoton huli sa pisog kaini na garo mansana lagting, matagas, gurudol-gudol o kurumbot. An bunga kaini sa luwas patos nin mahimpis na hibo pero bako man magatol sa pagkapot. Sinasabing an Tsina an pinakadakulang nagproprodyusir kan melokoton.^[3]

An Tsina an igwang pinaka mahiwas na tanoman kaini. Ini, alagad, mahiwas man na pinag'aataman asin pinagkukultibar, sunod-sunod sa saindang pagkadakul, sa Italya, Espanya, Estados Unidos asin Gresya.

Ginatos man an mga "cultivar" kaini mala ta grabe an pagkakairiba kaini sa langkaw nin pagtalubo, an hitsura mismo asin kolor kan bunga, an pagburak niya, an ugali nin pagtubo, an sukol kan prutas, an lumoy asin tagas kan laman, kolor kaining laman, an pagkadukot kan lagting sa laman dawa totoo ini bakong haloy na sarayon na dai mararaot. Alagad, sa iba-iba niyang patamboon, an melokoton nakukuang matubang magtalubo sa manlaen-laen na rona na iba-iba an klima asin geograpikong kamugtakan siring sa habagatan kan Kanada asin sa mga lantad nin Tailandya.^[4]

An melokoton lakop na tinitinda sa bilog na kinaban na de-lata ngane madali asin pasil an pagbyahe.

Mga panluwas na takod

[1] Archived 2010-06-10 at the Wayback Machine. Pagpatalubo nin melokoton. Kinua 29-08-15.
[2] Pagpabisto kan prutas. Kinua 29-08-15.
[3] Archived 2013-01-14 at the Wayback Machine. The Introduction and Diffusion of Peach in Ancient Italy. Kinua 29-08-15.