Leni Robredo

(Pinagbalikwat gikan sa Maria Leonor Robredo)

Si Maria Leonor "Leni" Gerona-Robredo (Abril 23, 1965) iyo an ika-14 asin presenteng Bise Presidente kan Republika kan Filipinas. Siya nagin representante kan Ika-3ng Distrito|Ika-3ng Distrito kan Camarines Sur sa Kamara de Representantes kan Filipinas kan 2013 sagkod 2016. Siya sarong abogado, politiko asin an balo kan dating sekretaryo kan Departamento kan Panlaog asin Lokal na Pamamahala na si Jesse Robredo. Katakod siya sa Saligan, sarong grupo nin mga abogado sa nasyon na nagtatabang sa mga parauma.[1][2] Siya an ika-2ng babae nagtukaw bilang bise-presidente sunod ki Gloria Macapagal Arroyo asin pinakaenot na Bise-presidente haleng Rehiyon Bikol.

Leni Robredo
VP Leni Meeting with Pres Duterte Cropped 2016.jpg
Ika-14ng Bise Presidente kan Filipinas
Inkumbent
Pagtukaw sa pwesto
Hunyo 30, 2016
President Rodrigo Duterte
Suminunod ki Jejomar Binay
Co-Chairperson of the Inter-Agency Committee on Anti-Illegal Drugs
Termino
Nobyembre 6, 2019 – Nobyembre 24, 2019
Serving with Aaron Aquino
President Rodrigo Duterte
Chair of the Housing and Urban Development Coordinating Council
Termino
Hulyo 12, 2016 – Desyembre 5, 2016
President Rodrigo Duterte
Suminunod ki Jejomar Binay
Sinundan ni Leoncio Evasco Jr.
Myembro kan Kamara kan mga Representante
from Camarines Sur's Ika-3 Distrito
Termino
Hunyo 30, 2013 – Hunyo 30, 2016
Suminunod ki Luis Villafuerte
Sinundan ni Gabriel Bordado
Personal na mga detalye
Kamundagan Maria Leonor Sto. Tomas Gerona
(1965-04-23) Abril 23, 1965 (edad 55)
Naga, Camarines Sur, Filipinas
Partido politikal Liberal
Mga aki 3
Dinakulaan Syudad nin Naga
Edukasyon University of the Philippines Diliman (BS)
San Beda University (LL.M.)
University of Nueva Caceres (LLB)
Websityo Official website
Government website
Si Leni Robredo asin mga aki niyang sinda Jessica Marie "Aika", Janine Patricia asin Jillian Therese


Agi-agiLiwaton

Si Robredo iyo an matua sa tulong akì kan retiradong huwes na si Antonio Gerona asin Salvacion Sto. Tomas na retiradong paratukdô. Nag-adal siya nin elementarya sagkod sekundarya sa Universidad de Sta. Isabel sa Syudad nin Naga mantang nagtapos siya nin batsilyer sa ekonomiks sa Unibersidad kan Pilipinas kan 1986 dangan nagkua nin abogasiya sa Unibersidad kan Nueva Caceres kan 1992. Kan 1997, nagkua asin nakapasar siya sa eksamen sa Bar. Nagkua man siya nin kurso sa Law and Ethics: Making Moral Decisions sa Harvard na Unibersidad sa Estados Unidos[3]

Saiyang tinugdas an Lakas ng Kababaihan ng Naga asin nagin pamayo kan Naga City Council for Women durante kan siya first lady kan Syudad nin Naga. Myembro man siya kan Sentro ng Alternatibong Lingap Panligal, Federacion Internacionales de Abogadas asin Bantay Familia.[4]

Siring kan lolohon na si Apolonio Sto. Tomas, si Robredo nakapagsurat man sa tataramon na Bikol. Kagsurat si Robredo nin mga giya sa pag-adal asin mga pagpalis kaini sa Bikol siring kan Family Code Primer, Katarungang Pambarangay, Labor Standards, Primer sa Naga City Ordinance No. 98-033 (Kaantabay sa Kauswagan Ordinance) asin RA 9262: Ley Kontra sa Violencia sa Kababaihan asin sa mga Aki.

Sarô si Robredo sa mga kandidato para magin huwes sa Regional Trial Court kan Calabanga, Pili sa Camarines Sur o Syudad nin Ligao sa Albay alagad nagdesisyon na igilid mùna an paglaog sa hudikatura.[5].

Tinàwan onra si Robredo kan Volunteers Against Crime and Corruption (VACC) bilang Most Outstanding Private Prosecutor kan 2009 Siring man, huli sa marahayrahay na pagpadalagan kan Naga City Council for Women (NCCW) na saiyang pinanginotan, nakua kan Syudad nin Naga an pagbisto asin premyo nilang Most Gender Responsive Local Government Unit sa bilog na Filipinas gikan sa Philippine Commision on Women (PCW).

Kan Agosto 2012, si Robredo nabalo asin kaiba niya an tulong aki, anas babae: Jessica Marie "Aika", Janine Patricia asin Jillian Therese kan magadan an agom niyang si Jesse Robredo sa pagbagsak kan eroplanong nasasakayan duman sa kadagatan kan Masbate.[6]

Buhay politikaLiwaton

Kandidato para Alkalde kan Syudad nin Naga

Kan taon 2007 iyo an inot na pagkakataon na nagdalagan sa politika bilang alkalde kan Syudad nin Naga si Leni Robredo kan siya alokon ni Jesse Robredo sa huring mga minuto kan pagpasa nin kandidatura. Ini huli sa antisipasyon kan kasong diskwalipikasyon na isinàngat ni Jojo Villafuerte sa alkalde kaidto kan eleksyon 2004 kun sain nadaog si Villafuerte. [7]

KongresoLiwaton

Presenteng pamayo kan Partido Liberal sa Camarines Sur si Robredo asin nagdalagan sa pagka-kongresista kan terser distrito kan probinsya kontra ki Nelly Favis Villafuerte, agom ni Luis Villafuerte, Sr. kan Mayo 2013. Iprinoklamang ganador si Robredo sa ginibong pirilian asin nakalamang nin labi sa 71,330ng boto sa pinakaharaning kandidato na si Nelly Villafuerte. Siya an pinakainot na babaing representante kan terser distrito kan Camarines Sur sa Kamara de Representantes kan Filipinas. Bàgo kaini, inot siyang inalok na magkandidato pagkaalkalde kan Syudad nin Naga tanganing ipadagos an napoonan kan saiyang agom. [8]

Nasyunal na posisyonLiwaton

Ginana bilang bise-presidente

Dakol na grupo an nagtulod saiya na magdalagan pagkasenador kan Filipinas kan 2016 alagad nagin bukas siya sa posibilidad na magkandidato para Bise Presidente kun sain sarô an saiyang pangaran sa nagluwas sa survey.[9]

Petsa 5 nin Oktobre 2015 kan ihinayag ni Robredo na siya minadalagan bilang Bise Presidente kan Filipinas sa lindong kan Partido Liberal kaiba si Mar Roxas bilang kandidato bilang Presidente. Nakaguno siya nin 14,418,817 boto o 35.11 porsyento kan kagabsan na boto asin dinaog si Senador Bongbong Marcos nin 263,473 boto sa pwesto komo bise-presidente.[10]

ToltolanLiwaton

  1. Begas, Leifbilly (May 4, 2016). "Leni: I’m tough, I fight for what is right". Inquirer Bandera. http://bandera.inquirer.net/121461/leni-im-tough-i-fight-for-what-is-right. 
  2. "Vote PH 2016: Leni Robredo". Philippine Daily Inquirer. April 10, 2016. http://www.inquirer.net/elections2016/leni-robredo. 
  3. Philippine Daily Inquirer (August 24, 2012). "That first night, I knew he was gone—Robredo’s wife". Philippine Daily Inquirer. https://newsinfo.inquirer.net/256594/that-first-night-i-knew-he-was-gone-robredos-wife. 
  4. [1]Buhay-buhay ni Leni Robredo. Kinua 11-25-20.
  5. [2] Kinua 11-25-20.
  6. [3]Jesse Robredo nagadan paglagpak kan sinasakayan na eroplano. Kinua 11-25-20
  7. [4] Leni Robredo nagkandidato para alkalde kan Syudad nin Naga.Kinua 12-2-2020.
  8. [5] Gana sa pagkarepresentante laban kontra ki Nelly Favis Villafuerte. Kinua 11-25-20.
  9. [6]Nangengenot sa survey. Kinua 11-25-20.
  10. [7] Kapangganahan ni Robredo kontra Bongbong Marcos sa pagkaBise-president. Kinua 11-25-20