Katedral nin Manila
An Basilica Menor asin Metropolitanong Katedral kan Immaculada Concepcion, inaapod man na Katedral nin Manila, sarong simbahan kan Katoliko Romano namomogtak sa parte kan Intramuros, sa Manila, Filipinas. Ini an harong kan Arsobispado kan Manila. Pirang beses na ini nagaba asin narumpag huli sa mga kasulo asin linog sa saiyang agi-agi nin lampas nang apat na gatos na taon.
An presenteng estruktura natapos nahaman kan taon 1958, na masabing ika-anom nang mayor na pahirahay. Idinulot siya ki Santa Maria sa titulong "Nuestra Señora de Inmaculada Concepcion" huli sa papel niyang patrona kan enterong Filipinas.
Agi-agi
baguhon
An enot na katedral simple sanang gibo sa tiklad asin kawayan. Nagaba ini kan bagyo kan 1582 asin natomtom sa kalayo kan 1583. An sumonod na pinatogdok taon 1581 gibo na sa gapo. Ini man narogba' huli sa linog kan taon 1600.
An ika-tolong katedral na pinatindog pino'nan kan 1594. An bagong estruktura, na may tolong nave asin pitong kapilya, pinagbendito kan 1614. Ini naman narogba kan linog kan taon 1645. An ika-apat na katedral, na engrandeng gayo, pino'nan matogdok kan 1654 asin natapos kan taon 1671, alagad naraot na grabe kan taon 1863 huli sa makusogon na linog. Pati an palasyo kan Gobernador Heneral nakadamay. Kan 1880 saro naman na abang kusog na linog nagtanyog kan katedral, mala ta napukan asin naputol an kampanaryo. Nasulit sana ini kan taon 1959.
An ika-limang katedral nahaman sa laog kan mga taon 1870-1879. Nabendito ini sa solemneng seremonya kan Desyembre 1879. Masabi pa, narogba' giraray ini ta pigbomba kan 1945 kan mangyari an Batalya sa Manila laban sa mga hapon.
An presenteng katedral tinogdok poon 1954 abot 1958 kan nakatukaw si Arsobispo kan Manila na si Rufino Jiao Cardinal Santos. Ini ginibo sa direksyon ni Arkitekto Fernando Ocampo, sarong National Artist nin Arkitektura kan Filipinas. An simbahan iginantad sa ranggo nin sarong basilica minore kan taon 1981 ni Santo Papa Paul II.
Mga panluwas na takod
baguhon- Opisyal na websayt kan Manila Katedral- http://www.manilacathedral.org/
- An Manila Katedral, Saiyang Istorya. http://www.philippines-travel-guide.com/manila-cathedral.html Archived 2017-06-18 at the Wayback Machine.
