Macario A. Mariano

Si Macario A. Mariano (Enero 2, 1891 - Desyembre 2, 1972^[1]) sarong Filipinong negosyante, kagsadiri nin mga subdivision, pilantropo asin district forester. Siya namundag sa Asingan, Pangasinan asin napangagom si Irene Pea^[2] na sarong Albayano an pamilya gikan sa Malinao asin Oas. Sinda dai nagkaaki alagad nagadoptar legalmente nin duwa na iyo sinda Jose P. Mariano asin Erlinda Mariano-Villanueva.^[3]^[4]

Edukasyon

Nagkua siya kan saiyang sekundarya sa Pangasinan High School asin kan saiyang Ranger Course sa School of Forestry sa Unibersidad nin Pilipinas, dangan BS sa Forestry sa UP man giraray (1928). Bago pa natapos niya an kurso siya nakapasar sa Civil Service Exam bilang Assistant Forester.

Serbisyo sa gobyerno

Siya nanombrang OIC sa Forest Station Headquarters sa Guinyangan, Lopez, Calawag, Tayabas asin Ragay, Camarines Sur (1915 - 1919). Nagin man siyang Chief kan Forest Reconnaissance Party sa Davao dangan OIC kan Forest District kan Rehiyon Bicol na binibilog kan Camarines Sur, Camarines Norte, Albay, Catanduanes asin Masbate na an opisina namomogtak sa banwaan nin Naga (1920 - 1921). Manlaenlaen pang katongdan kinapotan niya manongod sa pagbantay sa kadlagan sa iba pang mga lugar siring kan Panay, Romblon, Negros Occidental (1926 -1927) na an opisina sa Iloilo. Siya an nag'organisar kan suway na forest district nin Davao kinu'lit sa distrito forestal kan Zamboanga kun saen siya an enot kaining District Forester (1928 -1929). Siya nagin man District Forester kan Central Luzon, sakop an Nueva Vizcaya, Nueva Ecija, Pangasinan asin Tarlac na may headquarter sa Cabanatuan (1930 - 1933). Dangan siya nagin Senior Forester-at-large nakabase sa opisina sa Manila na may ranggong Chief of Division (1933). Saro siya sa nagkondukta kan land classification kan mga bukid nin Isarog, Mayon, asin Bulusan sa tuyong ini madeklarang mga parke nasyonal. Siya man an nagtolod na mamukna an pinakaenot na Bicol National Park igdi sa Rehiyon Bikol.

Nagretiro siya sa lindong kan Osmena Retirement Act kan Nobyembre 26, 1935. Tolos siya nakuang magin manager kan Sta. Clara Lumber Co., sa Gingoog, Misamis Oriental (1935 -1949).

Pulitika

Sa Gingoog, Misamis Oriental naelihir siyang municipal councilor (1938) asin liwat naelihir kan taon 1941, na iyong gayo pagputok kan Ikaduwang Gerang Pankinaban. Kan gera, siya naghubo sa Leyte kun saen siya an District Forester kan Gobyernong kumonwelt na mayong malinaw na namugtakan na opisina. Kan Oktobre 1955, siya nanombrahan konsehal sa siyudad nin Naga na posible an saiyang pigsalidahan sa turno iyo si Ramon R. San Andres.^[5]

Siya nagin aktibong kaapil kan Partido Liberal asin ngane nagin tesorero asin adviser kan Partidong ini.

Mga negosyo

Laen kan saiyang pagkapot kan Sta. Clara Lumber Company, siya nagtogdas kabakas si Jose A. Gimenez kan City Heights Subdivision (22.9301 ektarya)^[6]sa siyudad nin Naga, asin nagkaag solong pagsasadiri kan Mariano Village Subdivision (18.953 ektarya) sa syudad man nin Naga.

Mga donasyon

Huli sa hiwas kan saiyang mga pagsasadiring daga, nakuang magdonar nin mga lote para sa pakinabang kan mga namamanwaan kan siyudad nin Naga. Nagdonar siyang 10,000 metro kwadradong lote sa barangay Dayangdang asin barangay Balatas para sa pagkaag nin eskwelahan, nagdonar siyang mga right-of-way para sa pagkaag mga tinampo, asin nagdonar siyang limang ektaryang lote kun saen nakatindog na an City Hall, asin 11,062 m.k. para sa togdokan nin saod.

Alagad, an limang ektaryang donasyon sa Siyudad nin Naga nabawe kan mga tagamana ni Mariano na sinda Danilo David S. Mariano asin pag'iribang kadugo' sa rason na mayo man tunay na nangyaring donasyon. Sa lawig kan kaso nakaabot sa Korte Suprema na ultimamente nagbaba' kan desisyon na tunay asin totoo mayong nangyaring donasyon asin pinapalayas an Siyudad sa lugar na naookupar kaini o logod magrenta sa okupado kaini.^[7]

Hilnga

An Kaso Legal kan mga Mariano Kontra sa Siyudad nin Naga‎

Ginunuan

Barias, Alfredo. Bicol Biographical Encyclopedia. Bicol Research and Publication Center. Copyright 1969.(All copyright remains with the author)

Toltolan

↑ [1]. sc.judiciary.gov.ph. Kinua 18-08-18
↑ Sa Bicol Biographical Encyclopedia ni Alfredo Barias, an agom ni Mariano nagngangaran na Irene de la Peña alagad mas masiri' an mga Korte pag'abot sa mga pangaran. Kinua 20-08-128
↑ [2]sc.judiciary.gov.ph. Kinua 18-08-18
↑ Barias, Alfredo. Bicol Biographical Encyclopedia. Bicol Research and Publication Center. Copyright 1969. Kinua 18-08-18
↑ [3] Archived 2005-12-03 at the Wayback Machine.www.naga.gov.ph. Kinua 18-08-18
↑ Sa Bicol Biographical Encyclopedia ni Alfredo Barias, sinasabing 55 ektarya an hiwas kan subdibisyon
↑ [4] Archived 2018-02-23 at the Wayback Machine. www.lawphil.net. Kinua 18-08-18

Sarong tamboan an artikulong ini. Makakatabang ka sa Wikipedia sa pagpoon kaining pahina.

[1] [1]. sc.judiciary.gov.ph. Kinua 18-08-18

[2] Sa Bicol Biographical Encyclopedia ni Alfredo Barias, an agom ni Mariano nagngangaran na Irene de la Peña alagad mas masiri' an mga Korte pag'abot sa mga pangaran. Kinua 20-08-128

[3] [2]sc.judiciary.gov.ph. Kinua 18-08-18

[4] Barias, Alfredo. Bicol Biographical Encyclopedia. Bicol Research and Publication Center. Copyright 1969. Kinua 18-08-18

[5] [3] Archived 2005-12-03 at the Wayback Machine.www.naga.gov.ph. Kinua 18-08-18

[6] Sa Bicol Biographical Encyclopedia ni Alfredo Barias, sinasabing 55 ektarya an hiwas kan subdibisyon

[7] [4] Archived 2018-02-23 at the Wayback Machine. www.lawphil.net. Kinua 18-08-18

[1]

[2]

[3]

[4]

[5]

[6]

[7]