Jose Rey

Si Jose G. Rey, Sr. (Nobyembre 12, 1922 - Oktobre 20, 1976) na an gaha' "Pepito", sarong Bikolanong pintor, kompositor, musikero asin kagtogdas nin orkestra.

Ladawan:Jose Pepito Rey.JPG

Si Jose "Pepito" Rey

Si Rey kaiba aki niyang si Francia II

Ladawan:Penafrancia Church 1966 (Rey).jpg

Simbahan Penafrancia 1966

Pamilya

An mga magurang niya iyo sinda Epifanio Rey, na namundag sa Libmanan, Camarines Sur asin may dugong Intsik asin si Esperanza na namundag sa Bgy. Sabang, syudad nin Naga. Ining si Jose may duwang tugang, si Carmen R. Torres asin si Nenita R. Briñas.

Manta si Jose nagkaigwang duwang agom, enot ki Consuelo Cases asin may duwang aki siya igdi, si Jesus asin Consuelo. Sa ikaduwang agom niya, na si Saturnina Gumba, nagkaigwa siyang siyam na aki na iyo sinda: Francia I, Francia II, Jose, Jr., Lilybel, Jose II, Jose III (Joey), Jose IV (Lito), Marissa asin si Jose V (Joel).

Edukasyon

Si Rey nagtapos nin kurso sa Fine Arts sa Unibersidad kan Pilipinas saka nagkuang correspondence course naghahale pang Amerika dapit sa silk-screen printing.

Agi-agi sa buhay asin karera

Mga pintura ni Pepito Rey sa Museo Historico de Universidad de Sta. Isabel

Susog sa istorya kan pamilya niya, si Jose an enot nagdara kan silk screen na pag'imprinta sa Naga, y siya man an kaenotenoteng tagagibo kan mga cine slide na advertisment sa mga sinehan ni Bichara. Igwa man siyang sarong art shop (Rey Art Shop: The Home of Fine and Applied Arts) na kan taon 1945 yaon na asin ini kataid kan Moderna Bakery saka kan Funeraria Gaudioso Imperial diyan sa lugar kun saen namumugtak an presenteng Jollibee (na an edipisyong okupado kaini iyo idtong Holiday Hotel na sadiri kan mga Ravanera). Sa shop na ini bantogan siyang paragibo nin mga karatula o billboard kan mga negosyo. Alagad, ini sarong hanapbuhay sana. An tunay niyang pagkamoot sa buhay iyo an pagpinta bilang sarong tunay na pintor. An talentong ini mahihiling sa doseng darakulang kwadro na pinintura niya (mga taon 1968-69) na nagiistorya kan agi-agi kan Colegio de Sta. Isabel (ngonyan, Universidad de Sta. Isabel). Ngonyan an onse kan pinintura niya nakataralay sa duwang Reading Hall kan Library asin an saro yaon sa Museo kan Unibersidad de Sta. Isabel. (Sabi kan aki niyang saro, kinontrata kan Colegio si ama niya sa Php 5,000.00 an lambang kwadro). Masambit lang, an orihinal na logo asin hitsura kan karatula kan Quality Bakery siya pa man daa an naggibo.

Ladawan:Pintura ni Rey.JPG

Mga pinintura ni Pepito Rey (Sa USI)

Ladawan:An Nabombang colegio de Sta. isabel.JPG

An USI kan Binomba, 1945 (Rey, 1968)

May talento man sa musika, siya nagtogdas kan si bantogan na orkestra igdi sa Naga, an Tito Rey Orchestra. Mala ta an magkapirang orihinal niyang myembro igdi iyo sinda Remy Patanao, Jose Dumalasa, Antonio San Jose, William Purificacion asin si Gerry Latumbo na gabos man an mga ini nagsaradiri naman magpundar nin saindang mga orkestra o kombo. Laen pa kaiyan, serioso siyang kompositor asin dakul man siyang tinokdang mga kantang Ingles na tinotogtog kan saiyang orkestra. Walong komposisyon niya iyo an mga minasunod, tituladong: "You are my inspiration", "Naga river blues", "Waltz in June", "Maytime", "Ten Little Indians", "Malacal Lawani Isle", "Jungle Drum", asin "Only a Memory".

Pagpoon-poon kan Bicol Mail, siya an nagin karikaturista kaini. Nagtokdo man siyang silk screen processing sa mga estudyante kan dating Colegio de Santa Isabel. Siya nagin man aktibong kaapil kan Rotary Club of Naga.

Siya nagadan kan taon 1976 asin nakalubong sa lumang sementeryo kan Peñafrancia.

Toltolan

1. Mga impormasyon igdi susog sa pahayag asin osipon ni Francia I Rey Vargas asin ni Francia II R. Nisolada, mga aki Jose Rey.