Burak Hain Ka Na!

An Burak Hain Ka Na! sarô sa mga rawitdawit ni Clemente Alejandria.

Hoyop nin Amihan daghan ko sinindak

Huli kan amyo mo sa doros kasalak

Haros akalâ kong namâ mapahamak

Harimhim ako simo;

Habo kong masayang an hamot mo Burak.

Ako taid kita kan banging gimata,

An idinaing ko inohoan mo na,

An kabitoonan tiningrawan kita,

An bulan nagsabi pati:

An saindong puso ngonian pigsaro na.

Idtong sumpaan ta di sukat lingawan

Iyo ta an saksi an bitoon, bulan

Idtong simong OHO panong kahamisan

Itinanom ko sa puso,

Iyo an orog kong pinapanganog’nan.

Naglalanat ako, Burak na maogma

Naghale kang hilom anong dahelan ta

Nagpa Abra na’ko, Visayas, Zamboanga;

Nalosong ka gayod sako.

Nahilman! Nawara! Burak Hain ka na.