Baligang

An balì'gang o igot (Syzgium curranii) sarong klaseng tinanom na nagkakahoy, nalangkaw mga siyam na metro o sobra pa. An bunga kaini porongot, birilogbilogon, mga 20 mm an diametro, asin nagkokolor mairom na pula, minsan lila, hanggan itom kun tirom na, tanda na hirinog na. An hinog kaini mahamis-hamis na masarosakrot asin mahamyo.^[1] Apod pa man kaini igdi sa Kabikolan, malu'gang o amhi'.

Ini kinakakan na dai na linuluto asin an iba ginugògô ini sa asin ngane magtaong kagat sa namit. An tagok man kaini ginigibong arak asin harani an saiyang namit asin kolor sa red wine na gibo hale sa ubas. Nagagamit pa man an prutas kaini sa paggibong atsara, ensalada, inomon na pampapresko o santan. Kapamilya kan balìgang an aratilis, asin bugnay. An bali'gang namumurak asin nabunga sa bulan nin Marso, Abril, Mayo, Hunyo asin Hulyo, panahon na tig-init.

An tinanom na ini tal na tubo sa Filipinas, orog na igdi sa ronang Bicol. Sa ibang rona inaapod man ining lipote, bahag o igot.