An Mga Kahoy

Sarô sa tokdang rawitdawit ni Clemente Alejandria:

An Mga Kahoy

Digdi sa satuyang rona balakid an kakahoyan,

May makonot, may matapô, asin may matatagas man

May sa bukid minatubo, sa patag, may sa banwaan

Iyan gabos atiroon, atamanon, paglanganan

Ta isinamno yan gabos kan Dios paglalanga an kinaban

Tagamang erok nin yaman, sa tawo pamanang yaman

An kahoy natao sato nin bolong asin nin songo

May kahoy na nagbubunga sadyang kakanon nin tawo

Kun panahon nin masaldang, an limpoy itinatao

Pagbalid-balid kan dahon, mahayahay, abaniko

Asin balakid an kahoy na satong kinakaipo

Kun harong na palindongan an satuyang ginigibo

Sabi kan mga kamagurangan sa talinhagang olayon

"An nagtatanom nin kahoy nagtatanom nin paglaom--

An nagtatanom na daing sudya; paglaom na maogmahon;

Paglaom iyan kaidto pa sagkod sa huring panahon"

Kaya, garong namamale, kun paghonahonaon

Idtong daing pangondangan kun nagpopotol nin kahoy