Alice Reyes

Si Alice Garcia Reyes (namundag, Oktobre 14, 1942) sarong parabayle, choreographer, maestra, asin direktor. Nagmukna' kan Ballet Philippines, siya ginawadan onra kan ika-20 nin Hunyo, 2014 ni Presidente Aquino bilang Artista Nasyonal kan Filipinas. Siya an naghingowa na magin hustong popular an bayleng moderno sa nasyon kan an Ballet Philippines magkonsyerto kan pinakaenot na bayleng moderno sa Cultural Center of the Philippines Main Theater kan Pebrero, 1970.

Alice Garcia Reyes
Kamundagan	Alice Garcia Reyes (1942-10-14)Oktobre 14, 1942
Trabaho	Filipinong choreographer, parabayle, maestra, direktor
Mga taon na aktibo	1969- presente
Agom	Ted Van Doorn
Mga magurang	Ricardo Reyes (ama), Adoracion Garcia (ina), mga tugang: Cecille, Denisa, Edna Vida
Mga gawad	Artista Nasyonal kan Filipinas

Pamilya/Pag'aadal

Si Reyes aki na Ricardo Reyes, na naapod na Philippine Folk Dancer kan enot na panahon, asin Adoracion Reyes, sarong voice teacher. An saiyang naagom iyo si Ted Van Doorn, sarong Amerikano.Sa hubin pang edad, siya nag'adal nin classical ballet sa pagtukdo ni Rosalia Merino mantang nagkaklase sa Maryknoll College. Dangan orog na natais siya sa arteng ini sa paggigiya ni Leonor Orosa Goquingco asin ni Ricardo Casell sa Philippine Women's University (PWU). Nagtraining man siya sa folk dance sa Bayanihan Philippine National Dance Company. Dugang pa, siya nagpaAmerika ta duman nagtraining siya sa bayleng moderno asin sa jazz. An sobra sa duwang dekada nin propesyonal na karera sa pagbayle, saiyang ipinahiling an husay niya asin bisyon sa arte, an igot asin bulanos na pagkamoot sa arte nin pagbayle na nagtaong markang matagom sa bayleng filipino.

Impluwensya

Si Reyes iyo an nagpukaw asin nagsabrit kan gama-gama kan Filipino sa moderno asin kontemporaryong mga bayle sa entablado na nahihiling sa pagbuskad kan dakul na mga kompanya sa bayle, mga maestra, maestro sa pagbayle, mga choreographer na nagturunga, asin sa mga kawili-wiling mga repertoire sa bayleng moderno igdi sa Filipinas. Sa ngoyan siya direktor emeritus kan Ballet Philippines na saiyang namukna 20 anyos nakaagi.

Sinasabi na an magabat asin mayor na kaambagan ni Reyes sa bayleng filipina iyo an pagbuskad nin sadiring idiom sa bayleng moderno nin Filipino. Naguno' nin mga materyales asin tagbo' sa mga natural na kamugtakan igdi sa Filipinas, na nagpapahayag sin mga hiro' asin estilong nagsusugad sa mga bayleng tradisyonal kan filipino, an modernong bayle asin classical ballet matryumpong nagmukna nin kontemporaryong lenggwahe nin bayle na filipinong-filipino. Sa enot na masterpiece niya na iyo an Amada, abot sa klasikong bayleng moderno nahihiling sa Itim-Asu, sagkod sa ultimong obra niya Bayanihan Remembered na saiyang minukna' para sa Ballet Philippines, ginamit niya an siring na idiom sa pagbusol nin napapalaen na hitsura kan arte, kultura asin pamanang yaman kan Filipinas.

Ballet Philippines

An Ballet Philippines, na natogdas kan 1969 ni Reyes katuwang si Eddie Elejar asin sa suporta kan Cultural Center of the Philippines, nagprodyusir na nin 500 na obrang koreograpiko asin nag'aning paayaw-ayaw na omaw sa iba-ibang parte kan kinaban. Sa pagbyahe sa luwas, gamit an pangaran na CCP Dance Company, si Reyes asin an saiyang kairiba pinahangang gayo an saindang mga tagadalan sa Australya, London, Rusya, Alemanya asin sa bilog na Asya. An istorya manongod sa Ballet Philippines, istorya daa kan buhay ni Alice Reyes.

Mga mayor na obra

• Amada (1969)
• At a Maranaw Gathering (1970)
• Itim-Asu (1971)
• Tales of the Manuvu (1977)
• Rama Hari (1980)
• Bayanihan Remembered (1987)