Tatsean

An tatsean parati kwartang takal an ginagamit sa pagkawat asin kwartang taya igdi an ginagana; an bato kwartang takal man. An makarawat pwede duwa, tolo o pira pa man depende sa pagka'oroyon kan mga pag'iriba. Kun an makarawat tolo halimbawa asin an taya tigtotolong piso sinda, an mga taya na ikakaag sa tahaw kan binilog na guhit, siyam na peso gabos. Ngane makua kun isay mamano, makurit sa huruharayo asin matongtong sa sarong lugar sana asin ipapa'olanto an bato duman sa ginuhit. An pinakaharani sa guhit iyo an mano. An laban iyo an pagdaklag sa tiniripon na mga takal kan bato na takal na kwarta man giraray. Kun matamaan an saro o duwang takal na makaluwas sa kurit, an mga ini masasadiri na kan nagtira. Kun mayong mapaluwas, an masunod sa mano iyo an matira naman. Paribay-ribay an magkakarawat sagkod na maubos an mga taya'.

An kawat na ini haros garo sarong sugal na asin parati an nakawat kaini mga bagongtawo na naedad sampolo pataas. Totoo, pwede man iba an pagkaoroyonan na gaganahon, halimbawa an balon na kakanon kan kakawat na kun ini estudyante. O pwede sarong gamit itaya sa laban nin tatsean.

Sa kawat na ini kaipuhan an husay sa paghimunta kan nakataya asin pwersa sa pag'apon kan bato na kayang mapatalsik an taya na makarayo asin makaluwas sa binilog na guhit.