San Ignacio de Loyola

MGA AGI-AGI KAN MGA SANTO

An agi-agi ni San Ignacio de Loyola sarong tutuong-buhay na istorya nin pagkamuot asin

milagro kan kusog buot kan sarog tao na pinakusog kan langitnon na grasya. Si Ignacio sarong taong mapang-abaw-abaw asin ambisyosong soldados kan hadi na kan na-convertir sa Kristyanismo, nagi lugod makusog na soldados ni Kristo.

Namundag siya kan Disyembre 24, 1491, pinaka-nguhod sa doseng magturugang. Kan naka-nuod sanang magbasa asin surat si Ignacio, pinadara na siya sa korte ni Fernando asin Isabella na maging taga-anunsyo kan kahadean ninda. Nagi siyang para-surat nin mga romantikong suraton asin dawit.Naging ispirasyon nya sa pagsurat si Prinsesa Juana asin kadakul siyang mga ginibo para digdi. Bilang soldados, ipina-heling nya man an saiyang kakusugan asin isog sa pa-agi nin pag-kontrol sa mga tao.

Kan si mga Pranses sinakop an Pamplona, nalugadan si Ignacio sa tabay habang nakikilaban sinda sa mga ini. Pagkatapos kan si operasyon saiya, nagkahelang siya nin grabe asin haros mawaraan na siyang hinangos. Itinao na saiya si huring Sacramento, an pag-olyo. Sarong milagro na na-ulian pa siya. Kan siya nagpaparahay, duang libro an binasa nya: An Agi-agi Ni Kristo asin An Mga Burak kan mga Santos. Sa pagbasa nya sa mga librong ini, nagkaigwa siyang ma-imbod na mawuton na maging arog kan mga santong nabasa nya, an pagserbihan, bako an kahadean sa kinaban na ini kan mga tao, kundi an Kahadean mismo ni Kristo digdi sa daga.

Kan bisperas kan Anunsiyason kantaon 1552, niribay ni Ignacio si magarbo nyang kubing sa sarong parakilimos sa tinampo asin naglaog siya sa simbahan ni Nuestra Señora de Monserrat. Pig-sabit nya si saiyang espada sa pamitisan kan imahen.

Pagkatapos nin magdamlag na pag-tenir nya sa simbahan, inako nya an Banal na Hawak ni Kristo asin pinunan nya na an saiyang paglakaw paduman sa Manresa. Kadakol na tentasyon asin pag-ulog-ulog an saiyang nasabatan asin na-agihan, pero dae an mga ini naging ulang para ipadagos nya an ispiritwal nyang mga ginigibo. Sa pa-agi kan Grasya kan Kagurangnan, ma-trayumpo nya ang mga ining nalampasan. Pagka-agi nin pirang taon, sinuratan nya an Duke kan Gandia, na saiyang taga-sunod, kan saiyang usip kan tutuong penitensya. " Kun an hawak may ka-matean, dae an kalag makaka-panksyunar na marhay...Kamutan ta asin pangatamanon an satuyang mga hawak ta ini an makakatabang asin magiging masinunod-sunod sa satuyang mga kalag. Sa pa-aging ini, an kalag makaka-pagserbing marhay sa satuyang Kagurangnan. Isikwal an anuman na klase ni pangkukulog, pag-tiris nin dugo...mas marhay na idulot sa Kagurangnan an mga kasakitan, i-atang an mga luha para sa kasalan, ini an pampa-kusog kan pagtubod,pag-laom, ka-ogmahan, pagma-kulog sa kapwa, ispiritwal na katoninongan asin kamurawayan sa Dios."

Nagpahingalo muna si Ignacio sa pagbabalangibog nya kan Marhay na gibo-gibo asin nag-adal siya en preparasyon para sa ma-abot pa nyang mga misyon. Nag-adal siya sa manlaen-laen na colegio sa Espanya asin Pransya. Nag-gradwar siya sa Unibersidad kan Pransya.

Sa saiyang mga pag-viaje, naging kaibahan nya sina Padre Faber, Francisco Xavier asin iba pa. Kan Agosto 15, 1534, siya asin an anom nya pang kaibahan, inako ninda an udok sa buot na pagtios asin kalinigan. Kan 1537, siya asin si mga kaibanan nya pa, naka-ulay si Papa Paulo III, na na-ogmang marhay sa saindang mawuton na pagbalangibog kan marhay na bareta asin gibo-gibo kan Kagurangnan. Kaya sinda pigbasbasan asin pig-ordinan. Naresibe asin na-regognisar officialmente an Kompanya ni Hesus kan Setyembre 27, 1540. Maski kontra sa kagustuhan ni Ignacio, na-elehir siyang Enot na Heneral kan Sociedad. puon kadto, mantang pinapadagos nya an saiyang mga gibo sa pagbalangibog kan Banal na Tataramon, nag-aataman sa may kahelangan,pag-tabang sa mga babaeng na-api, nakulugan, asin iba-iba pang marhay na mga actibidades, an pinaka-obheto nya iyo an matapos an saiyang sinusuratt na libro," Ehersisyo Ispiritwal ". Bako na siyang militanteng soldados kan kinaban, kundi soldados ni Kristo na idefensa an Simbahan asin palakupon an Kahadean kan Kagurangnan.

An saiyang labi-labing kamawutan na mag-solo-solo asin maghurophurop an nag-tulod saiya na maghale na bilang Heneral kan Sociedad, pero an mga miyembros nagkontra kaini. Kaya ipinadagos nya an pag-giya sa mga ini lalo na sa panahon nin kasakitan asin pagpurbar na raoton an Sociedad. An pinaka-huri iyo an kan naging Papa si Caraffa kan 1556, na dati nyang ka-kontraryo pa kadto sa Paris. Pig-purbaran ni Caraffa na baguhon asin ribayan an mga Kasundan kan Sociedad. Sa panahon na idto na labi-labing pagpurbar na ra-uton an saiyang halos buong buhay nyang mga pigtrabahuhan, naka-sumaro nya an Kagurangnan asin dae siya nawaran paglaom. Ipina-batid nya sana ini sa pa-agi kan mga tataramon na:

" Kun kakulugan man ma-abot sakuya,kun an mga ini bako man na sakuyang sala,maski an Sociedad mag-tunaw arog kan asin sa dagat, minatubod ako na an kag-apat na oras na Kaiba ko an Kagurangnan, bastante na ma-aling asin magdulot sakuya nin katoninongan ".

Sa mga lalaki, babae, joven asin gurang, duman sa nagpapara-hadit sa saindang yaman, kwarta asin katanyagan,si Ignacio an ehemplo kan kalmadong katoninongan.

Kan amay na parte kan taon 1556, si Ignacio nagka-helang...Pagal na an hawak nya sa tinaon na pagpinitensya,magabat na trabaho asin pagbalangibog kan mga Gibo asin Tataramon kan Kagurangnan, garo siya kandilang nasusulo sa pagkamuot sa Diyos asin banwaan. Kinalintura siya asin nagpa-aram kan ika-31, Hulyo, 1556, sa edad na sisenta y cinco años. Binayaan nya sa pamamahala an Sociedad sa tolong Heswitang Ka-padian: Sina Padres Polanco, Madrid asin Natal. Pig-beatificar ni Papa Paulo V si San Ignacio de Loyola asin pig-canonizar kan taon 1628 ni Papa Gregorio XV.

Kan panahon na naglalakop an Protestanismo, dakulang parte kan Europa an nawara sa simbahan, si San Ignacio an Soldados ni Kristo na nakipag-laban. An dakulang ispiritwalidad nin pag-handuyog nya sa saiyang mga kaibanan asin taga-sunod sa enterong kinaban nin Kristyanismo, nakapa-laog sa saiyang librong sinurat, bistado bilang Pundasyon kan Ehersisyo Ispiritwal : " An tao piglalang para omawon asin magserbi sa Kagurangnan, para ma-salbar an saiyang kala. Asin an ibang bagay sa lalawgon kan kinaban ginibo para sa tao para matabangan siya sa pagsunod kan obheto kan siya piglalang. Kaya, an tao dapat gamiton an mga "piglalang" (creatures) digdi sa kinaban para siya matabangan asin mag-rayo/hale digdi kun an mga ini nagiging olang sa pagsunod kan obheto kun tano an tao piglalang. "

Si San Ignacio de Loyola, edukador kan ka-akian,. Ngonian, an mga colegio kan Heswita, unibersidades asin isntitusyon pang-edukasyon, an mga instrumento/ agihan para ma-edukar an mga ka-akian, mag-guno nin idealismo, karakter asin inspirasyon sa buhay. An sabi nya sa mga gustong mag-sunod ki Kristo, gibuhon an gabos," para sa Urog Na Kamurawayan Kan Kagurangnan." FOR THE GREATER GLORY OF GOD!