Sá Nogueira

Si Rolando Sá Nogueira, (Lisbon, Mayo 19, 1921 – Nobyembre 18, 2002), iyo an saro sa sinasabing pinakaimportanteng pintor kan saiyang henerasyon; sabi daa ni José Augusto França, si Nogueira namumugtak sa ikatolong alon kan ika-20ng siglong mga modernong Portuges na pintor [1]. Aki ni Augusto Vieira de Sá Nogueira asin Amélia Dantas Pereira, si Rolando Sá Nogueira namundag sa Lisbon kan Mayo 19, 1921. Limang taon siya nag'estar sa Angola, poon pagkamundag niya ta duman an saiyang ama nadestino sa saiyang karera militar.

Sá Nogueira, 1977

Pamilya

Saiyang napangagom si Bina Sá Nogueira, asin igwa sindang duwang aking babae: si Paula asin si Mariana.

Edukasyon asin karera

An mga amay niyang mga kurit – na ginibo mantang siya nag'aadal sa Lisbon School of Fine Arts –, nakakaagid sa mga obra ninda Matisse asin Modigliani; alagad nakua niya man giraray sadiri niyang boses, na saiyang piglaladawan an mga ta'nawon asin uru-aldaw na pamumuhay sa mga modernong lugar nin Lisbon sa mas personal, asin sensitibong mga pinta, asin siya nagrayo sa mga prominente asin makukusog na mga agos sa Portuges na kinaban nin arte kan mga 1940 asin mga 1950.

Sa pag'ultan nin 1962 asin 1964 siya nag'adal sa Birmingham asin sa Slade School of Fine Art, London. Ining gayo nakapagamiaw saiya kan mga amay na pagtunga kan inaapod na Pop Art; sa London man siya naimpluensyang marhay kan si 1963 Kurt Schwitters na paeksibit sa Marlborough galeriya. Pagbalik niya sa Portugal, naghira nang gayo an saiyang trabaho; an saiyang espasyo piktoryal mas nagrani sa sinasabing kubismo asin nagpoon na siyang mag'usar kan collage asin kan inaapod na photo sensitized canvas.

Na mayong pag'untok, poon mga 1980 padagos sa presente an trabaho niya maluway naghihira, asin nagbabalik sa mas tradisiyonal na mga halaga nin pagdodrowing na garo tipo nin naratibong mas nakakarani sa trabaho niya kan mga 1950.

Si Sá Nogueira nagpaeksibit nin labis sa mga masurunod na taon, kadamay mga grupo-grupo o solo man siya; kan 1998 siya nagpaeksibit nin husto pagkahiwas sa Chiado Museum, Lisbon. Asin man siya maimpluwensyang gayo komo sarong maestro sa pagdrowing- poon 1965 siya nagtukdo sa Sociedade Nacional de Belas Artes, Lisbon, sa Oporto School of Fine Arts, sa Lisbon Faculty of Architecture, asin iba pa -, na naimpluwensyang marhay niya henerasyon nin mga hubin na mga artistang Portuges siring ki (Pedro Calapez, Manuel Botelho, asin dakul pang iba).

Mga bantogan na obra

Si Sa Nogueira nabantog na gayo kan saiyang mga pinta na: "Nú feminino", "Mezzo tinto", "Jardim suspenso I", asin "Ah! Que les raisins sont capiteux."

Notang pamitisan

• FRANÇA, José Augusto – A Arte em Portugal no Século XX: 1911-1961. Lisboa: Bertrand Editora, 1991, p. 405.

Bibliograpiya

• NOGUEiRA, Sá – Sá Nogueira: retrospectiva. Lisbon: Chiado Museum, 1998,