Rupiah kan Indonesya

An rupiah (simbolo: Rp; kodigo nin kwarta: IDR) iyo an opisyal na kwarta kan Indonesya. Pig-iisyu iyan asin kontrolado kan Bank Indonesia. An saiyang ngaran ginuno sa katagang Sanskrito para sa pirak, rupyakam (रूप्यकम्).Kun minsan, an mga Indones impormal nindang piggagamit an katagang perak ("pirak" sa Indones) na nanonongod sa mga baryang rupiah. Pigbabanga an rupiah sa 100 sentimo (Indones: sen), minsan ngani an halangkaw na implasyon ginibong mayong halaga an gabos na mga barya na denomindo sa sentimo.

An pinakahuring kwartang inisyu kan Bank Indonesia kaidtong 2022

Ipinamidbid kaidtong 1946 kan mga nasyunalistang Indones na naglaban para sa katalingkasan, rinibayan kan kwarta an sarong bersyon kan Netherlands Indies gulden, na ipinamidbid durante kan okupasyon kan mga Hapones sa World War II. Sa saiyang amay na mga taon, ginamit an rupiah na kaiba an ibang mga kwarta, kabali an mga bàgong bersyon kan gulden na ipinamidbid kan mga Dutch. An kaislahan kan Riau asin an kabanga kan New Guinea na sakop kan Indonesya (Irian Barat) igwa kan saindang baryant kan rupiah sa nakaaging mga panahon, alagad an mga ini nagpasakop na sa nasyonal na rupiah kaidtong 1964 asin 1971 (hilingon rupiah kan Riau asin rupiah kan Solnopan na Irian).