Rudolf Bonnet

Si Johan Rudolf Bonnet (30 Marso 1895, Amsterdam - 18 Abril 1978, Laren) sarong Holandes na artista na nag'estar haros kan bilog na buhay niya sa banwaan nin Ubud sa Bali, Indonesya.^[1]

Siya namundag sa pamilyang dugong Hugonote na pirang henerasyon mga paratinapay. Siya nag'atender sa Rijksakademie van Beeldende Kunsten sa Amsterdam.

Mga taon bago maghubo' sa Bali

Kan 1920, siya nagbyahe sa Italya kairiba saiyang mga magurang, na kan sa byaheng idto siya nagprodyusir nin dagmang na mga drowing nin mga pigurang-tawo, mga tagbo nin baryo, asin mga ta'nawon. Nagbalik siya sa Italya asin igdi nag'arkila siya nin studio pirang bulan. Sa Roma, natagboan niya si W.O.J. Nieuwenkamp na nagswestyon saiya na magbisita sa Bali, alagad si Bonnet nagpasiring ngona sa Norte Aprika. An mga pinturang nahaman niya igdi nabentang husto sa mga eksibisyon asin nagkanigo sa gasto niya pagpasiring sa Bali.^[2]

Bali

"Ni Radji" ni Rudolf Bonnet, Bali, 1954

Siya nag'abot sa Bali kan 1929 kun saen sarong artistang Aleman, si Walter Spies asin sarong Holandes na musikologo, si Jaap Kunst saiyang nagkabiristo. Kaiba si Kunst, siya nagpasiring sa Nias, asin dangan kaidto siya nagbalik sa Bali kan 1930. Siya naagda na mag'estar sa Ubud ni Cokorda Gde Raka Sukawati.^[3] Sa pag'ultan nin 1929 asin 1940 si Bonnet nagpirmi sa Ubud. Kan si Spies naghubo' sa Campuhan, si Bonnet inukopar an water palace ni Spies sa Ubud asin duman siya nagkaag kan saiyang studio. Duman siya naimbwelto sa mga isyu sa komunidad siring sa salud asin edukasyon. Siya hararom man na naimbwelto sa mobimyento nin Pita Maha, na ini nagbusol sa mga artistang lokal na itaas saindang lebel kan saindang arte. Kan umabot an mga Hapon sa Bali, si Bonnet libre pa maghiro hanggan 1942 kan siya sinubol na maghale asin magpasiring sa Sulawesi. An panahon niya sa kalawigan kan Ikaduwang Gerang Pankinaban naka'estar siya sa kampong kulongan sa Pare-Pare, Bolong asin sa Makassar.^[4] Kan 1947 si Bonnet nagbalik sa Bali kun saen duman nagtugdok kan saiyang harong asin studio sa Campuan.^[5] Maski ngani nagro'ro' an relasyon kan Indonesya asin Netherlands, si Bonnet nakapasige pag'estar duman huli sa relasyon niya ki Presidente Sukarno na nagdamot nin 14 kan saiyang mga obra. Kaya lang siya pinatalsik sa Indonesya kan 1957 kan siya nagsayuma na taposon an retrato ginigibo niya ki Sukarno;^[6] alagad, 15 taon pakalihis, siya nakabalik.

Pita Maha

Si Bonnet, kairiba sinda Walter Spies, I Gusti Nyoman Lempad asin Cokorde Gde Agung Sukawati nagbilog kan grupong Pita Maha (Dakulang Espiritu, Dakulang Pasabong) kan 1936 sa paghagay kan mga artista na an mga trabaho mahuhusay asin maninigo na ipabakal sa magkapirang mga galeriya asin ibali sa mga eksibisyon sa luwas kan Indies, siring kan sa The Netherlands asin sa Estados Unidos. An Pita Maha nabungkag kan si Spies pinalayas sa Indonesya huli sa kargong gaweng usmak. Si Bonnet naghale naman asin an gera nagbungkaras.^[7]

Museum Puri Lukisan

Museum Puri Lukisan, 'An palasyo nin mga Pintura' pinagtugdok susog sa desenyo ni Bonnet na iyo an sarayan kan mga de kalidad na mga arte na tiniripon ninda Bonnet asin Cokorda Gde Agung Sukawati. Pagtugdok kaini nagpoon 1954. Kan siya pinalayas kan 1957, dakul nag'ngata na siya pabalikon sa Bali. Kan siya nagbalik man giraray kan 1972, siya nagtabang na padakulaon an museo asin nagtabang sa pagorganisar kan pambungsod na eksibisyon.

Kagadanan

Si Rudolf Bonnet nagadan sa Laren, Holland kan Abril 18, 1978 paka'ayaw nin halawig na paghelang. An saiyang bangkay pinag'abo asin ibinalik sa Bali kun saen dakulang seremonya nin pag'aabo kasabay kan bangkay kan amigo niyang si Cokorda Gde Agung Sukawati an ginibo.^[8]^[9]

Kataytayan nin mga ladawan

Toog na buhay, mga kalabasa(1950s)
Ni Radji Bali (1954)
Monumento dedikado ki Walter Spies
Tagbo' sa saod

Toltolan

↑ "Museum Puri Lukisan history". Museum Puri Lukisan. Archived from the original on 2011-07-14. Retrieved 2009-02-08.
↑ Ruud Spratt, Artists on Bali, pp 40 Pepin Press. ISBN 90 5496 018 3
↑ Pringle pp 134-136
↑ "Artist Johan Rudolf Bonnet". www.geringerart.com. Retrieved 2011-06-22.
↑ Ruud Spratt, Artists on Bali, Pepin Press. pp 43. ISBN 90 5496 018 3
↑ Ruud Spratt, Artists on Bali, Pepin Press. pp 44 ISBN 90 5496 018 3
↑ Ruud Spratt, Artists on Bali, Pepin Press. pp 42 ISBN 90 5496 018 3
↑ Ruud Spratt, Artists on Bali, Pepin Press. pp 44. ISBN 90 5496 018 3
↑ "Artist Johan Rudolf Bonnet". www.geringerart.com. Retrieved 2011-06-22.

Pringle, Robert (2004). Bali: Indonesia's Hindu Realm; A short history of. Short History of Asia Series. Allen & Unwin. ISBN 1-86508-863-3.

Sarong saringsing an artikulong ini. Makakatabang ka sa Bikol Wikipedia sa pagparambong kaining pahina.

[1] "Museum Puri Lukisan history". Museum Puri Lukisan. Archived from the original on 2011-07-14. Retrieved 2009-02-08.

[2] Ruud Spratt, Artists on Bali, pp 40 Pepin Press. ISBN 90 5496 018 3

[3] Pringle pp 134-136

[4] "Artist Johan Rudolf Bonnet". www.geringerart.com. Retrieved 2011-06-22.

[5] Ruud Spratt, Artists on Bali, Pepin Press. pp 43. ISBN 90 5496 018 3

[6] Ruud Spratt, Artists on Bali, Pepin Press. pp 44 ISBN 90 5496 018 3

[7] Ruud Spratt, Artists on Bali, Pepin Press. pp 42 ISBN 90 5496 018 3

[8] Ruud Spratt, Artists on Bali, Pepin Press. pp 44. ISBN 90 5496 018 3

[9] "Artist Johan Rudolf Bonnet". www.geringerart.com. Retrieved 2011-06-22.

[1]

[2]

[3]

[4]

[5]

[6]

[7]

[8]

[9]