Que lugar este kan dayo sa sadiring banwa
An Que lugar este kan dayo sa sadiring banwa an enot na libro ki rawitdawit ni Jaime Jesus Borlagdan na iniluwas kan Hunyo 22, 2009 sa Syudad nin Tabaco.
Pigbibilog ki duwang koleksiyon an nasabing libro: an saro iyo an Que lugar este kan dayo sa sadiring banwa buda an Karangahan. Ginawadan kan Premio Tomas Arejola para sa Literaturang Bikolnon an Karanghan bilang pinakamarhay na koleksiyon ki rawitdawit kan 2006; pinalista man an Que luagar este kan dayo sa sadiring banwa kan taon 2004.
Laog
baguhonIgwang 47ng rawitdawit buda duwang tula an libro, gabos manungod sa Tabaco, orog na sa dati kaining saudan na A.A. Berces Memorial Supermarket kun sain nagdakula si Borlagdan.
Paliwanag ni Borlagdan manungod sa libro:
Pigsususog kan mga tulang ini an dalan pauli sa sarong nalingawan nang harong-banwaan; sarong pagsungko sa nabayaan na lugar na kinadakulaan. Tabaco an rona, pero kun isasangat sa lebel kan kagabsan, saro ining simbolo kan gabos na dati— baad sa kaakian— pinadabang maray, dangan nawara, dangan ngonian— baad sa kagurangan— labi-labing pighihidaw. May mga ulian kitang arog kaini, na yaon na sana sa mapa kan satong pagrumdom. Sa saindang pagkabura, dagos na ining nabulag satuya. Sa kalingawan nawara ta sinda, pero dawa dai na mabuhat an gadan o maibalik an kaakian, baad lamang sa pag-rumdom otro, makakua ki kapahingaloan an saindang mga multo. Mga tula ining nagkikiling, nagbibisa, buda nagrorokyaw kan mga warara na digdi. Lambang saro nagtataram na an pag-rumdom saro man na lugar kun sain an daing kasagkodan nakakuang ulian.
