Proletaryat

An proletaryat o proletariat (/ˌproʊlɪˈtɛəriət/; Plantilya:Etymology) iyo an klase sosyal kan mga parapatandan, idtong mga myembro kan sosyedad na an mga pagsasadiri sana na may halaga iyo an saindang pag'espwerso sa trabaho (kapasidad ninda sa pagdarudal). An myembro sa siring na ripondipon iyo an inaapod na proletaryat. Sa Pilosopiyang Marsismo hinihiling na an proletaryat naaapi sa lindong nin kapitalismo, na napipiritan mag'ako nin kakadikit na tandan balos sa pag'operar kan mga gamit nin produksyon, na rogaring kan mga kagsadiri kan mga negosyo, an inapod na bourgeoisie.

An mga kagmukna kan Komunismo

Si Marx nakikiasusangan na an pag'aaping ini natao sa proletaryat nin kumon na mga interes politika asin ekonomiko na nalampas sa mga anoman na linderos nasyonal, na nagsusunson sainda na magkaburunyog asin agawon an kapangyarihan sa mga kapitalistang grupo, asin ngapit makamukna nin komunistang sosyedad talingkas sa anoman na distinksyon nin klase, na kun saen gabos pantay-pantay.

Republika Romana asin Imperyo

Kadagdagan na impormasyon: Konstitusyon kan Republika Romano

An proletarii binibilog nin sarong klase sosyal nin mga namamanwaan Romano na haros mayong pagsasadiri o mayong propiedad. An termino daang ini pwede naggikan sa pagsensus, na an mga autoridad Romano ginigibo lambang limang taon ngani makagibo nin rehistro nin mga namamanwaan asin an mga rogaring kaini, na ini an nadeterminar kan saindang mga obligasyon militar asin mga prebilihiyo sa pagboto. Idtong may mga rogaring na 11,000 assēs o kumulang igdi nahuhulog sa pinakahababang kategorya para sa serbisyo militar, asin an saindang mga aki—prōlēs (mga inaki)— iyo an ilinilista imbes an propriedad; kunsiring ini ginikanan kan pangaran proletarius (nagpoprodyusir nin mga aki). An mga Romanong soldados na namamanwaan nabayad magsadiri kan saindang gamit na mga kabayo asin mga armas, asin nalaban para sa kumonwelt, alagad an ambag militar sana kan proletarius iyo an saindang mga aki, para sa mga namamanwaan na Romano na iyo an magkokolonya kan mga nasakop na mga teritoryo. Opisyalmente, an mga mayong-rogaring na namamanwaan inaapod na capite censi ta sinda "mga persona na pigrehistro bako sa propiedad ninda...kundi huli sa saindang pagkapresente komo mga indibidwal na nabubuhay, primeramente bilang payo (caput) nin sarong pamilya.