Pinangat Festival
Pinangat Festival an kapiyestahan kan Camalig, Albay na pangenganyar sa mga turista asin sa mga negosyanteng magkainteres man na magkaag negosyo sa banwaan. Tuyong rinorokyaw ini sa laog kan bulan na Hunyo.
An okasyon na ini nagtataong doon sa sarong produktong Camalignon na iyo an pinangat, na dakul na Bikolano an nagsasabi na iba man an pakaluto asin an pakasiram.
An pinangat kan Camalig ginigibo nin siring: nakirinit nin mga dahon natong, sinasalak igdi an balaw, tinoktok na diit na pulang laya, buda sisalakan nin rinunot na tabangongo o karneng orig. Ini gabos pinapatos sa malomhok na dahon kan natong, binubugkosan asin linuluto sa guta nin niyog. Syempre, kun gusto ini magin mainit asin maharang, sinasangkapan pa nin pigrunot na siling labuyo.
Igdi sa Festival, an banwang Camalig pinupukawan an gabos na tawan atensyon an saiyang kakayahan asin mga kayamanan. Pinapahiling kun ano an saiyang mga posibleng makakayang gibohon magin man sa pag-ogma asin man sa paghingoa. Iyo ini an panahon nin paglinga asin pagatid-atid kan mga Camalignon kun paano mapatalubo an sadiring yaman sa kultura asin sa ekonomiya.
Sa mga aldaw nin Festival, itinalaan an mga kompetitsyon, mga karawat, mga pagtogtog nin banda, karantahan, parada, mga eksibit kan produktong Camalignon, mga kakayahan sa isports asin mga pagarayonan kan saiyang mga malalambing na mga daraga.
Tampok sa kapiyestahan iyo an pagpatibayan sa pagkakan nin maharangon na lada' (sili) asin an paghulmag sa pinangat burger na dakulaon na, may palaman pang pinangat na rinamasan kadakul na siling labuyo. Ini an mga aktibidad na pan-turista, mala ta nakalaog na sa libro kan Guinness an pagkamatibay kan taga-Camalig sa pag-nguta asin paghamil nin mahaharang.
An Pinangat Festival kan Camalig nagpropromesa sa mga bisita asin paradalan, mga turista man o mga dayo hale iba-ibang probinsya, nin mas maogmang kaalingan sa maarabot pang panahon.
Mga pangluwas na takod
baguhon- Albay Tourism, Festivals Archived 2008-05-12 at the Wayback Machine.
- Official Website of Camalig, Albay
