Philtranco Transport Heritage Museum

An Philtranco Transport Heritage Museum sarong museo namumugtak sa barangay San Nicolas, Syudad nin Iriga na nagtatampok kan agi-agi kan pinakainot na transportasyon sa Filipinas.^[1] Ini iyo an A.L. Ammen Transportation Company, Inc., na tinugdas kan Hulyo 6, 1914 kan sarong Amerikano, si Albert Louis Ammen. Ngunyan, an kompanyang ini dinadara nang pangaran na Philtranco Service Enterprises. Ining museo namukna kan Septyembre 3, 2000.^[2]

An museo iyo an solo-solong museo manungod sa transportasyon asin mayò pang ibang natugdas nin siring. Nasasaray digdi an mga gamit arog kan mga lumang makinilya, mga libro na hilingan kan mga mekaniko sa paghirahay nin awto, mga retrato kan mga inot na panahon nagpopoon-poon pa sana an ALATCO siring kan mga inot na awto kaini na an ruweda naggagamit pang gusok, mga retrato kan mga inot na kagsadiri kaini nagsurunod ki Ammen. Igdi sana nakukua an saro sa pipira na sanang kopya sa bilog na kinaban kan mahibogon na katalogo nin mga piyesa sa mga makinarya kan kompanyang Ford.

ALATCO

An pagsasadiri kan ALATCO nalito sa iba-ibang mga pamilya asin negosyante sa saiyang halawig na agi-agi. Napugol an operasyon kan magbungkaras an Ikaduwang Gerang Pankinaban. Ini nagpadagos liwat kan operasyon kan taon 1945 sa Syudad nin Tabaco, Albay alagad kan taon 1949 binakal kan D. Tuason, Inc., bagay na an pagrurugaring nalito na sa kamot nin Filipino. An parehong korporasyon binakal pa man an Bicol Transportation Company (BITRANCO) kan taon 1949 dangan an Consolidated Auto Lines (CAL) asin Mindoro Transportation Company (MINTRANCO) nabakal pa man kan kompaniyang ini kan taon 1954. Kan taon 1968, nasaro pa sa mga kompaniyang ini an Eastern Tayabas Bus Company (ETBCO). An pinagsararong mga kompaniyang ini sa transporte binakal gabos kan Mantrade Group of Companies kan taon 1971 asin an mga ini sinakop na sa bagong pangaran na Pantranco South Express Incorporated. Kan taon 1985, binago na an pangaran. Nagin nang Philtranco Service Enterprises.^[3]

Mga ladawan

Museo Philtranco
Interior kan Museo Philtranco
Katalogo nin mga piyesa kan Ford

Mga panluwas na takod

Toltolan

↑ Abuan, Hermie G. Philtranco, Transport Heritage Museum: ang nag-iisang museo ng transportasyon sa bansa. Kabayan September 28, 2000
↑ "Dapit sa agi-agi kan Philtranco". Archived from the original on 2016-01-16. Retrieved 2016-02-05.
↑ Impormasyon ginuno sa NHI Marker, 2000 Kinua 02-11-14

Pinopoonan an artikulong ini. Makakatabang ka sa Bikol Wikipedia sa pagparambong kaining pahina.

[1] Abuan, Hermie G. Philtranco, Transport Heritage Museum: ang nag-iisang museo ng transportasyon sa bansa. Kabayan September 28, 2000

[2] "Dapit sa agi-agi kan Philtranco". Archived from the original on 2016-01-16. Retrieved 2016-02-05.

[3] Impormasyon ginuno sa NHI Marker, 2000 Kinua 02-11-14

[1]

[2]

[3]