Palasyo nin Westminster
An Palasyo nin Westminster iyo an taragboan kan Harong nin Commons asin Harong nin Lords, an duwang harong nin Parlamento kan Reyna Unido. Kumon na inaapod na Harong nin Parlamento huli sa mga okupante igdi, ini sinasabi man na 'Puso nin Pulitikang Briton'. An Palasyo naglulugar sa bandang amnayan kan Salog Tamesis sa Syudad nin Westminster, sa sentral na parte kan Londres. An pangaran kaini ginuno sa kataid na Westminster Abbey, ini pwedeng natutungdan an duwang estruktura: an edipisyo medieval na naradas sa kasulo kan 1834, o an kasangle kaini na Bagong Palasyo na nagtitindog sa presente. Para sa tuyong seremonyal, an palasyo retenido an orihinal na istilo asin status bilang residensya real asin pagrorogaring kan Korona.
An enot na palasyo real tinogdok sa lugar kan ika-11ng Siglo asin an Westminster iyo an residensya mayor kan mga Hade nin Inglatierra sagkod na ini nasulo haros gabos kan complex kan 1512. Dangan ini nagsirbeng harong kan Parlamento nin Inglatierra na kun saen nagtitiripon poon pa kan ika-13ng Siglo, asin ini man tukawan kan Korte Real nin Hustisya, na yaon sa Westminster Hall. Kan 1834, an mas grabeng karaba rinadas an pinatindog-liwat na mga Harong nin Parlamento, asin an estruktura medieval lamang an natada iyo an Westminster Hall, an Cloister of St. Stephen's, an Chapel of St. Mary Undercroft asin an Jewel Tower.
