Nupedia

An Nupedia sarong ensiklopedyang Ingles na yaon sa Web na an mga artikulo kaini pinapadara kan mga para'ambag na parasurat na binibistong eksperto sa bagay na sinusurat ninda, alagad bago ipublikar sa sityo inaagi ngona sa konsultasyon sa mga editor na may hararom na kabatiran sa bagay na sinurat. Ini pinupublikar bilang free content an lisensya. An Nupedia pinagmukna ni Jimmy Wales asin ginagastosan kan Bomis asin ta si Larry Sanger iyo an pamayong editor igdi.

Mga logo kan Nupedia

Alagad, ini dai naghaloy mala ta nagtagal sana poon Oktobre 1999 sundo Septyembre 2003 ta kulang man an nag'arambag na mga parasurat. Ugaring pati an Nupedia may 7-lakdang na proseso sa pag'aprobar kan mga artikulong naglalaog bago an mga ini isangat sa tuyong pagkontrol kan kalidad asin pagdakop kan ano man na mga sala sa mga sinurat kaya abalang marhay an pagtalubo kan ensiklopedya bakong kun an pig'adoptar na polisya iyo an an alisto, marikas na pagreparo paagi kan sistemang wiki. Mas gusto kaya kaini na an mga para'ambag mga eksperto, may hararom na kabatiran, posible may bitbit na PhD sa pangaran. Mas binibisto ini ngonyan bilang iyo an pino'nan asin ginikanan kan pagbutwa kan mas popular asin makusog na ensiklopedyang on-line na Wikipedia. Bago ini nagsara, ini nakahaman man asin nakapapublikar nin 25 mga artikulo na aprobado na, asin 74 na mga artikulo na yaon sa proseso nin pagreparo kan mga eksperto. Si Jimmy Wales mas pinili an mas marikas na sistemang wiki sa Wikipedia ta madali marikas an pag'ambag kan mga artikulo. Si Larry Sanger gusto man magkontrol sa linalaman kan mga artikulo sa Nupedia kaya pigtogdas niya an inapod niyang Citizendium, mala ta igdi na nagsuwayan an dalan kan duwang nagporoon sa Nupedia.

Mga panluwas na takod

• http://nupedia.wikia.com Archived 2019-10-18 at the Wayback Machine.