Nonoy, si Ina mo

An rawitdawit na sinurat sa lengguwaheng Bikol asin nagin ambag sa antolohiya na may titulong Mga Awit Para sa Ina sa An Tambobong nin Literaturang Bikolnon, Tomo 1 Blg. 3 Taon 2011, p. 45-46:

Ano daw ang gigibohon

Sa sarong akeng masutilon;

Sa ina daeng paggalang

Garong hade baga sa harong.

Giromdom ko kan ake ka pa, nonoy

Si ina mo nagpupuyat kaaantabay,

An hibi mo baga kantang mahayahay,

Sa paggios mong paluhay-luhay.

Sabay puknat, nagbubuhat

Pano nin handal asin kahaditan

Tibaad ka baya saiyang naipit

Sa pagal niyang nanok na pananglitan.

Uya, nonoy, hilnga sa litratong luma

An paghiyom mo maogma

Sa puso nakakapataba,

Yaman ni ina mo sa paggurang niya.

Ano daw kun idulot ki mama mo

Pagkamoot na daeng sagkod;

Uya hilnga, maski nonoy siya gurang na

Kaya pa niyang magsakdo, maglaba.

Nin huli ta pagkamoot niya bulanos

Daeng katampad na kuwartang ginatos;

Siya matindog sa madali mong pag-apod

Maski an bitis maluya, kaya pang magpagan-ot.

Sa lambang lakad niya pasiring saimo

Bilog niyang pagkamoot, dulot niyang gayo;

Alagad, ika baya nonoy, hilnga makusog pa

Habo lamang ma-istorbo o masugo niya.

Pira pa daw sa mundo an arog mong pabaya

Si ina mo nagdudusa sa tagas kan payo mo, hilnga

Ta amay minapahingalo, sa harong pinagdudulot an higos,

Ta mala ngani ngunyan gurang ka na, siya nagsisirbe pa.