Museo kan Unibersidad nin Nueva Caceres

An Museo nin Unibersidad kan Nueva Caceres iyo an ikaduwa pa sanang eskwelahan sa bilog na Filipinas na nakapakaag nin museo. Binuksan ini kan Oktobre 1, 1952 sa Unibersidad kan Nueva Caceres komo sarong proyekto kan kagmukna kan unibersidad na si Don Jaime Hernandez. Si Ignacio Meliton an pinakainot na curator asin kagpoon sa pagbilog kan museo.^[1]

An Museo dating makukua sa ika-3ng eskalon kan Antonio M. Sison Hall, bukas alas 9 abot alas dose nin aga (Lunes sagkod Sabado) asin ala-una abot ala singko y media kun hapon (Lunes hanggan Biyernes). Libre man an pagbisita asin pagbasa. Panahon kan pandemya, ini inilipat sa presenteng kinamumugtakan sa pag-ultanan kan Engineering Building asin UNC Sports Palace.

Mga tampok na koleksyon baguhon

An pagdamot asin pagtipon nin mga bagay na igwa nin halaga asin may kamanungdan sa Arte asin Syensia iyo an mayor na toon nin paghingoa kan museo. Katuyohan kaini an paghimuyaot na matimos, mapreserbar, maadalan asin maikaag sa esksibit an mga bagay na may aestitiko o syantipikong halaga.

Nababanga sa apat na pitak an museo: an Sentral na Galleria, an Archival Library, an Filipiniana, asin an Hernandez Memorabilia.

Sentral na Galleria baguhon

Ipinapahiling sa digdi an mga retrato na isinasaysay an ebolusyon kan eskwelahan gikan sa sadit na paadalan na inapod Nueva Caceres Colleges kan 1948 hanggan na ini magdakula asin magin sarong unibersidad kan 1954 sagkod sa panahon na presente.

Filipiniana baguhon

An pitak Filipiniana linalaman nin mga artifaks asin mga relikya dapit sa agi-agi kan Filipinas. Ini man nababanga sa apat na seksyon: Suanoy na Filipinas, Panahon nin Kastila, Panahon nin Amerikano asin Panahon kan Talingkas na Filipinas.

Archival Library baguhon

Nasasaray digdi an mga materyales asin mga dokumento bunga nin pag'aadal, urog na idtong dapit sa istorya kan Kabikolan, kan saiyang kultura asin panurat kan mga Bikolano. Sa kabtang na ini masambit na an pinakainot na curator kaini, si Ignacio Meliton, iyo an naglapigot na gayo na matipon asin mati'mos an mga artifaks asin mga kasuratan na Bikolnon.

Hernandez Memorabilia baguhon

An Hernandez Memorabilia sarong katiponan kan mga personal na rugaring, mga sinurat asin mga libro kan kagmukna kan unibersidad, si Don Jaime Hernandez, na nataong ilaw kan saiyang pambihirang kahamanan sa buhay, sarong tawo na an saiyang buhay asin paghihingoa sarong panalmingan nin napapalain na klaseng liderato asin serbisyo.