Museo Sugbo

An Museo Sugbo iyo an museo kan probinsya nin Cebu. An lugar na namomogtakan kaini dating karsel kan Cebu (apod dati, Carcel de Cebu) asin ini apat na bloke an rayo sana sa Plaza Independiencia.

Museo kan Cebu

Agi-agi

Denesinyo ni Domingo de Escondrillas kan 1869, an solong arkitekto kan Cebu kan panahon na idto, an Carcel de Cebu orihinalmente aporon kuta na Carcel del Distrito, an mayor na preso kan Distrito Visayas. Ini an rason kun napano ta may kadakulaan sa hiwas. Tinutubod na dakulang parte kan gapong bingkay ginamit igdi hale mansana sa ginaba na simbahan, an Simbahan Parian, kan taon 1878. Pakalihis duwang polong taon, an karsel pinahirahay kan 1892 na nagdugang nin mga edipisyo sa likod kan mayor na estruktura na ngonyan nagsisirbeng lugar kan anom na galeriya kan museo.

Bakong malinaw kun kasuarin idinugang an ikaduwang soson alagad an desenyo nagpapahiling na ini nahaman kan panahon kan peryodong kolonyal Amerikano. An karsel nagsirbeng langoban kan mga kriminal sa 135ng taon kan saiyang historya, alagad ini nagin man piotan kan mga Katipunero durante kan rebolusyon na kadaklan man ngane kaini piggaradan sa kamposanto Carreta na harani sana igdi. Kan panahon nin Amerikano, enot ini ginamit na kwadro kan mga kabayo na ginagamit sa Hipodromo (racetrack), dangan ginamit naman na karsel, para sa syudad asin para sa probinsya. Kan manakop an Hapon, dakul na mga gerilya an nagkakurulong igdi na kun saen nagsapo nin makuring pagkadog sa kamot kan mga Kempetai, an pulis na patago kan Hapon. Pakatapos kan gera, dakul kan mga makapili nagkakurulong man igdi. Poon 1950 sundo 1976, an atubangan na seksyon nagsirbeng karsel kan syudad manta an tolong estruktura sa likod bilang kulungan kan probinsya. An karsel duwang beses nagsangleng pangaran. Enot, naapod na Cebu Provincial Jail. Kan mga 1980 hinira an pangaran na nagin nang Cebu Provincial Detention and Rehabilitation Center (CPDRC).

Kan an preso hinubo na sa mas modernong edipisyo kan Desyembre 2004, an dating karsel ginibo nang museo, an Museo Sugbo, an repositoryo kan Pamanang Sugbuanon, asin ta ini napangyari kan si apat na enot na galeriya kan museo tinogdas kan Agosto 5, 2008. Kan Agosto 13, 2009, si Gob.Gwendolyn Garcia asin si Dr. Ambeth Ocampo, pamayo kan National Historical Institue, pinangenotan an mga dignitaryo sa pagbiklad kan National HIstorical Marker sa Museo Sugbo. Sinda man pig'inauguraran an Sangang Bisaya kan Museum of Political History. Sa hampang kaini an gobernador asin direktor kan National Museum na si Corazon Alvina piginauguraran man an National Museum Cebu Branch Galleries. An duwang sanga nag'ookupar man nin duwang suway na edipsiyo sa laog kan Museo Sugbo comples. Duwa pang eksibit an nabuksan, na iyo an Vicente Rama Memorabilia asin an Gregorio asin Jovito Abellana Memorabilia nakakaag sa magksasuway na galeriya. Igwa man ikinaag na Wheel of Good Fortune and Hapiness na nadukayan na sarong bobon panahon pang Espanyol kan may pahirahay kan 2009. Dangan naman apat pang galeriya an idinugang sa museo, kaya nagin nang total na 10. Kan 2010, duwa pang galeriya an hinaman, sarong Provincial Art Gallery asin an Cebu Media Gallery. Sarong reproduksyon nin buhay-preso sa 'bartolina' an ginibo saka may nadagdag pang tindahan nin mga souvenir.

Mga hilingon sa Museo

An museo pano nin mga bagay na maipo nanggad nang makua o mahiling. Yaon igdi mga retrato asin mga surat nin sarong Tomasito, mga dokumentong pirmado kan pinakaenot na gobernador na Espanyol, mga diksyonaryong Bisaya, mga lumang pang'imprintang makina, mga kwartang gibo-gibo kan mga gerilya panahon kan Ikaduwang Gerang Pankinaban, mga gamit asin armas kan mga soldados na Hapon, mga tokdang literaryo kan mga parasurat na Sugbuanon, mga gamit nin sarong istasyon nin radyo na mga luma na, mga kamera iba-ibang modelo, galeriya nin mga retrato kan mga presidente nin Filipinas, mga nakalot na mga artifaks kan soanoy na panahon asin kadakul pang nakalantad na maogmang gayong pagparahilingon ta bilang pagsirip kan mga nakaaging panahon.

Mga panluwas na takod

• [1] Penfires.com:Museo Sugbo:Must see Museum in Cebu Province.Kinua 15-10-16.
• [2]Zerothreetwo.com: A day in a Museum-Museo Sugbo. Kinua 15-10-16.

Toltolan

• Chawdhury, Ara (6 August 2008). "Old prison turns into museum". Inquirer (Philippines). Archived from the original on 9 June 2012. https://web.archive.org/web/20120609114243/http://globalnation.inquirer.net/cebudailynews/news/view/20080806-153005/Old-prison-turns-into-museum. Retrieved on 5 August 2016. 
• Serna, Roger (1 April 2009). "Museum on Philippine political history to materialize inside Museo Sugbo". Cebu Provincial News Center. Archived from the original on 3 April 2009. https://web.archive.org/web/20090403080743/http://sugbo.cebu.gov.ph/?Newsid=659&getwhatindex=2. Retrieved on 17 April 2010. 
• Lao, Garry B. (5 April 2009). "Museo Sugbo to house museum on RP history". Philippine Star. http://www.philstar.com/Article.aspx?articleid=455444. Retrieved on 17 April 2010. 
• Bersales, Jobers (14 August 2009). "Richer, more fascinating museum for Cebu". Inquirer (Philippines). Archived from the original on 14 August 2009. https://web.archive.org/web/20090814214444/http://globalnation.inquirer.net/cebudailynews/opinion/view/20090813-220083/Richer-more-fascinating-museum-for-Cebu. Retrieved on 5 August 2016. 
• "Colorful opening for Museo Sugbo". Inquirer (Philippines). 14 August 2009. Archived from the original on 9 June 2012. https://web.archive.org/web/20120609114255/http://globalnation.inquirer.net/cebudailynews/news/view/20090814-220244/Colorful-opening-for-Museo-Sugbo. Retrieved on 5 August 2016.