Masoneriya

An Masoneriya iyo an mga mapadapit sa mga kasararoan fraternal na nasusog kan saindang ginikanan sa mga lokal na guild nin mga mason na paghinapos kan Ika-13ng siglo iyo an nag'aataman kan mga kakayahan ninda sa pagtrabaho en relasyon sa mga autoridad asin mga klyente ninda. Ngonyan, an kasararoan na ini huli sa katuyohan na magkaigwang marhay na iribanan, magtaong tabang sa kapwa (pilantropo), magpukaw nin interes sa mga sibikong proyekto.

Simbolo kan Masoneriya

An Masoneriya ngonyan napipisan sa duwang grupo:

• Regular na Masoneriya pinipirit na dapat may bukas na banal na iskritura sa sarong nag'ooperar na lohiya, na mayong babae an dapat ipalaog o akoon, asin an anoman na urulay dapit sa relihiyon asin politika ipagbawal.
• An Kontinental na Masoneriya binibilog nin mga kasakopan na hinale an gabos o parte kan siring na mga pinagbabawal.

An pinakatugmad na yunit sa Masoneriya iyo an Lohiya. An mga pribadong katiponan na ini parati sakop asin pinagmamato nin sarong Nakakadakulang Lohiya sa rehiyonal o probinsyal na lebel. Mayong internasyonal o pangkinaban na Lohiya na namato sa Masoneriya, lambang Nagdadakulang Lohiya independyente, asin lambang saro dai man obligado na bistohon an arin man na lohiya bilang lehitimo.

An mga grado nin Masoneriya retenido an tolong grado na iyo an medieval craft na lohiya, an Entered Apprentice, Journeyman o fellow (ngonyan apod nang Fellowcraft), asin an Master Mason. An kandidato sa arinman na grado luwayluway tinutukdoan kan mga kahulogan kan mga simbolo sa masoneriya asin saiya itinitiwala an mga "takma", senyales asin mga tataramon na nagpapaisi sa kapwa kaapil na an siring na myembro natukdoan na asin naako na. An mga degree parte kan allegorical morality play asin parte lektura. An tolong degree na ini iyo an nabilog kan Craft (o Asul na Lohiya) kan Masoneriya asin an mga kaapil igdi inaapod na mga Mason. Igwa pang ibang mga degree alagad ini sa sarong lokalidad uso asin dai man makua sa iba saka suway man duman sa nagawad nin mga degree.

Huli sa mga salang pakasabot dapit sa Masoneriya dara kan an mga myembro igdi dai man nagpapara-usipon kan mga ritwal sa laog, an fraternidad pigtutubod kan i ba na may mga pambihirang praktis.