Malang (pintor)

Si Mauro Malang Santos (Enero 20, 1928 - Hunyo 10, 2017), na midbid sa gahang Malang, sarong Filipino asin premyadong karikaturista, ilustrador, asin mahusay na parapinta. Bilang sarong parakurit sa komiks nabisto siyang marhay sa seryeng Kosme the Cop, Chain Gang Charlie asin Beelzebub.

Si Malang aki ni Dan Santos asin Juliana Malang. Napangagom niya si Maria San Pedro, na nagkaigwa sindang apat na aki kabali an mga pintor man na si Steve Santos asin Soler Santos.

Nagpoon siyang makanood nin pagkurit ki Teodoro Buenaventura, sarong pribadong paratukdo, kan siya dyes anyos. Nag-adal siya sa Antonio Regador Elementary School kan 1934, asin nagklase siya nin sekondarya sa Arellano High School kan 1941. Sa laog nin sarong semestre, si Malang nag-adal sa Kolehiyo kan Fine Arts kan Unibersidad kan Pilipinas kan 1946. Nagpondo siya sa pag-eskwela nin pormal sa edad na 19 tanganing magtrabaho para sa departamento sa arte kan Manila Chronicle. Kan siya yaon pa sa peryodiko, nag-adal siya sa lindong kan karikaturistang si Liborio "Gat" Gatbonton. Durante kan 1972, si Malang nagklase sa Otis Art Institute sa Los Angeles, California, sa irarom nin tolong-bulan na iskolarsyip.