An itom (Ingles: black) iyo an sarong kolor na resulta kan pagkawara o biyong pag - sarumsom nin naheheling na liwanag. Saro ining kolor na achromatic, mayong hue, garo puti asin madarag. Parati ini ginagamit sa simbolikong paagi o sa piguratibong paagi tanganing magrepresentar sa kadikloman. An Itom asin puti parating ginagamit tanganing iladawan an kabaliktaran kan marahay asin maraot, an Panahon nin Kadikloman kontra sa Panahon nin Kaliwanagan, asin an banggi kontra sa aldaw. Poon kan Edad Media, an itom iyo an simbolikong kolor nin solemnidad asin awtoridad, asin sa dahelan na ini iyan sa parate isinusulot pa man giraray kan mga huwes asin mahistrado.

An kolor na itom.

An Itom saro sa enot na mga kolor na ginagamit kan mga pintor sa mga ipinintang lungib na Neolitiko.[1] Ginamit iyan sa suanoy na Ehipto asin Gresya bilang kolor kan kinaban sa irarom kan daga.[2] Sa Imperyo nin Roma, iyan nagin kolor nin pagmondo, asin sa nag-aging mga siglo iyan parateng konektado sa kagadanan, karatan, mga pararatak, asin mahika. Kan ika-14 siglo, iyan isinusulot nin mga hade, klero, hokom asin opisyal nin gobyerno sa kadaklan na parte kan Europa. Nagin kolor ini kan mga Ingles na romantikong poeta, negosyante asin estadista kan ika-19 siglo, asin halangkaw na kolor nin moda kan ika - 20 siglo. Sono sa mga surbey sa Europa asin Amerika del Norte, iyan an kolor na kadaklan konektado sa pagmondo, an katapusan, mga hilom, mahika, pwersa, kadahasan, takot, karatan asin tibay.[3]

Itom an pinakakomun na kolor nin tinta na ginagamit sa pag-imprenta nin mga libro, diaryo asin dokumento, mantang iyan nagtatao kan pinakahalangkaw na kalaenan sa puting papel asin sa siring iyo an pinakamadaling kolor na mababasa. Kaagid kaiyan, an itom na teksto sa sarong puting screen iyo an pinakakomun na format na ginagamit sa kompyuter.[4] Kaidtong Setyembre 2019, an pinakamadiklom na materyal gibo kan mga inhenyerong MIT hale sa bertikal na nayon na mga carbon nanotubes.[5]

Toltolan baguhon

  1. St. Clair, Kassia (2016). The Secret Lives of Colour. London: John Murray. p. 262. ISBN 9781473630819. OCLC 936144129. 
  2. Wilkinson, Richard H. (2003). The Complete Gods and Goddesses of Ancient Egypt. London: Thames & Hudson. ISBN 978-0-500-05120-7. 
  3. Eva Heller (2000), Psychologie de la couleur – effets et symboliques, pp. 105–27.
  4. Heller, Eva, Psychologie de la couleur – effets et symboliques (2009), p. 126
  5. Jennifer, Chu (12 September 2019). "MIT engineers develop "blackest black" material to date". MIT News Office. http://news.mit.edu/2019/blackest-black-material-cnt-0913.