Giyera sa Tuprik nin Laway

Ngiwi mong rapido, panduridot nin puso

Mga tataramong pakrit, bistado an mga demonyo.

Sambit mo an tagkarit, senyal na daang bago,

O pagturaok nin manok sa bubungan,

May bados daang daraga sa kataid nindo.

Dae pa daw nagsusubang an aldaw sa sirangan,

Mga estoryang raot kadakol ka nang imbento.

Hinais mong isip sa lamyerda, sambit kan iba, dara mo.

Nagkariribok sa ilawod nin huli sa tsismis kan dila mo,

Sa iraya nagpiyesta an mga ayam, nagribong an mga payo.

Sabi daa an laway may darang rabis o baya tetano;

Dae ako makatubod pero ngonyan na nahiling ko,

Tama gayod an sabi kan mga gurang kaidto:

An pusong maitom na dara-dara nin maraot na tawo,

espiritung madiklom na impluwensiya kan mundo!

Kaya dae baya magtubod tulos sa mga sabi-sabi,

Magtugang man siya o haloy mo nang kabistado,

na kun mangestorya garo bagang burabod na bagyo,

Inoorihan ka nang gayo, dae ka pang pagkamangno.

Tuprik niyang laway, minagiyera an bilog na mundo!