Ginutaan na santol

An ginutaan na santol luto kan kinodkod na laman kan bunga nin santol sa guta' kan niyog

Santol na gulay

Mga sangkap

Andamon an mga minasunod na sangkap:

1/2 k kinodkod na santol

1/4 k balaw (o, dini'lan)

1/4 k karne (parteng samsam)

5 tibuho na niyog

mga rekado (sibulyas, bawang, paminta, la'ya)

An pagluto

Enot, pugaan magkaduwa o tolong beses an kinodkod na santol ngane mahale an parong tigsom. Gumibo nin guta' pero sa kawali an enot na ikaag ngona iyo idtong panduwang guta'. Ikaag na an mga rekado arog kan sibulyas, bawang, dikit na lâya, asin paminta.Ikaag naman an balaw na hinugasan sa tubig pero dai pagpugaon. Pabulosan sana nin tubig sa saraan. Ikaag naman an karneng pigpiridaso. Parteng samsam an pilion ta may dikit na taba saka may laman. Halaton na magbuladbukad. Namitan kun may tamang askad. Kun ika tagaCamarines, mas maray an balaw Calabanga ta bakong sobrang askad. An balaw Daet maaskadon asin dai angay sa lutong ini. Pigtataga'ukag ngane sarama an pagkaluto saka dai magtotong sa irarom.

Pag'ati kan guta', ikaag naman an giniris na sili (ini kun gustong medyo maharang an luto). Dangan ikaag na an lipotok na guta'. Iyo ini su enot na pinuga' sa paguguta' kan niyog. Ukag'ukagon. Halaton na maghitsura nang naglalana'lana ta kun siring na, seguradong luto na.