Geisha

An Geisha (芸者) (/ˈɡeɪʃə/; Hapones: [ɡeːɕa]), na inaapod man na geiko (芸子) (sa Kyoto asin sa Kanazawa) o geigi (芸妓) na iyo sinda sarong ripondipon ni mga babaeng Haponesa na mga artistang paraaling pinagpaadal na husto sa mga bayle, sa mga pagkanta asin mga mahusay sa paghampang, makiulay asin paglibang sa mga bisita. An saindang naiibang hitsura nahihiling sa halabang sagyad-salog na kimono, tradisyonal na pagputos-buhok asin oshiroi na pagpintura sa pandok. An mga geisha naaling sa mga tiripon, kaurugmahan na inapod na ozashiki, ini parati sa paglilibang sa mga mayaman na bisita asin man sa pagpapadayaw sa entablado asin sa mga piyesta.

Panindog nin mga Miyagawa-chō geiko (geisha) Kimiha na nakasulot nin sarong pormal na itom na kimono (kurotomesode) asin chū taka shimada-style nihongami na wig.

Mga geisha nagtotogtog sa shamisen

An mga geisha pigpaadal sa mga kahusayan sa pagkanta, pagtogtog asin pagkawat nin mga instrumento musikal, pagbayle. Pwede man sindang makipasuba-suba o magsugot-sugot sa mga bisita alagad hanggan sana diyan ta sinda mga propesyonal na mga artista.

Bakong mga pampam

An mga modernong geisha bakong mga pampam. An salang paghuna' na ini nagpoon sa pagsararo na sana kan idtong mga mistress o kabit kan mga mayayaman, mga sex worker o idtong inapod na tayū na sa tradisyonal na paggubing gamit man an kimono. An pinakaenot na pagluwas kan babaeng geisha iyo kan taon 1751 ta bago kaiyan mga lalakeng geisha an yaon sa mga aling-alingan. Huri na kan nagbutwa an mga geisha na anas na babae.Sa totoo lang, an mga enot na geisha sa yūkaku mga lalake. Sinda binabansagan man na taiko mochi (parabombo) o hōkan, asin sinda nagluwas kan mga 1660 komo mga payaso na nagpapangisi sa mga hiro nindang garo mga luki'. Sinasabi na an iba sainda dati mga kulturadong tawo na nag'aging pagtios asin naghanapbuhay na lang komo paraaling sa mga putariya dati nindang dinadalaw-dalaw. Kan panahon na ini, an "geisha" sarong terminong panlalake, asin an nagpoporoon-poon na mga babae na maglaog sa propesyon na ini inaapod onna (female) geisha.