Francisco Alvarez

Si Francisco Alvarez (Hunyo 13, 1852)- ? ) sarong Bikolanong abogado asin pulitiko. Siya nagin Hokom sa Lagonoy (1891-1892), asin sa Nueva Caceres (1901-1902), dangan nagin Representante (1907-1916) kan ikatolong Distrito kan Ambos Camarines sa Asamblea Filipina.

Ladawan:Franciscoo alvarez.png

Si Francisco Alvarez

Edukasyon

Namundag sa Caramoan, Camarines Sur, siya nagkua kan saiyang elementarya duman mansana sa Caramoan, dangan kan saiyang sekundarya sa Seminario Conciliar de Nueva Caceres, asin kan saiyang Batsilyerato sa Colegio de San Juan de Letran. Nagtapos siyang abogasya sa Unibersidad kan Sto. Tomas asin nakapasar sa Bar kan 1903.

Karera

Nagpoon siya kan saiyang karera bilang eskribano sa Juzgado de 1.a Instancia de Camarines, dangan nagin siyang konsehal sa Nueva Caceres kan mamukna an Ayuntamiento, bago na siya nagin hokom sa Lagonoy.

Pagputok kan Rebolusyon

Pagbungkaras kan rebolusyon asin nagbutwa an Katipunan, siya nakadamay sa mga pigsahotan na mga rebelde arog kan mga martir na bikolano na pinabadil kan mga Kastila kan Enero 4, 1897. Alagad siya, kairiba si Eugenio Ocampo, Severo Patrimonio, Bendedicto Sabater, Esteban Villareal, Jose Desiderio, Tomas Valenciano, Eusebio Isaac, Pedro Brinlo, Ludovico Arejola, Miguel Pardo, asin Ramon Marty, sinda dinarakop, piglunad sa bapor na Isarog kan Septyembre 20, 1896 asin dinara sa Manila. Paghale duman saro siya, si Alvarez, na pigdestierro sa Fernando Poo, asin husto na sana an inagihan na sakit, pagtios asin kadog sa mga bantay na Kastila manta sinda sakay paduman sa islang idto sa Aprika. Kun bako na lang sa pagtabang kan Colonia Reformista de Filipinas siya dai makaluwas. Ta an grupong ini nalakaw ki Ministro de Ultramar na si Exmo. Sr. D. Segismundo Moret y Prendergast na mawarasan siya asin iba niyang kairibang bikolano nin indulto kan Pebrero 3, 1897. Alagad, siya dai nag'ule tolos. Nagtener siya sa Barcelona sagkod Marso 28. 1898 kun saen suminurat siya kan si agi-agi niya asin kan saiyang kairiba kan sinda isinakay sa bapor asta si pagkadestierro ninda sa Fernando Poo haros sarong taon. An sinurat niyang ini na tituladong Memorias Inedita De Mi Destierro a Fernando Poo, 1898 sinasabi totoo ni Dr. Danilo Gerona na sinurat na sana ini ni Alvarez sa paghorot kan mga Amerikano ta an huri gustong ipahiling na mariringis nanggad an mga Espanyol.

Panahon nin Amerikano

Pag'ule niya sa Filipinas, tiempong nagpoon na an gera sa pag'oltan kan Espanya asin Estados Unidos, siya kan Agosto 13, 1898, nagpabalik na sa probinsya nin Ambos Camarines kun saen nagbali sa pwersang rebolusyonaryo kan maghuros na igdi an pwersa ni Vicente Lukban. Alagad, kan mapasa' na an gobyerno rebolusyonaryo ni Aguinaldo, siya nagdesisyon na mag'ampoyon na sa gobyerno sibil na itinogdas kan mga Amerikano, asin siya naglaog sa Partido Federal. Nagtabang na siya sa pagpatoninong kan probinsyang Ambos Camarines mala ta saro siya sa pagtabang ki Ludovico Arejola na makabalik sa legalidad y bakong harayo na iyo pa siya an naglakaw na makalaog giraray si Arejola sa gobyerno. Kan mga taon na idto ogaring, si Alvarez iyo an Juez de Paz kan Nueva Cacers (1901-1902). Nagdemitir siya sa kargo asin nagpraktis na kan saiyang abogasya, nagkaag bupete sa Camarines asin sa Albay. Sabay kaini, nagtogdas siya asin siya pa an editor, kan peryodiko bi-semanal na La Paz (1901-1902), na an saiyang katuwang iyo si Robert E. Manly sa pagpadalagan kaini.

Ginunoan

• Artigas, Manuel. Galeria de filipinos ilustres : biografias a contar desde las primeros tiempos de la dominaci'on Hispana, de los hijos del pais que en sus respectivas profesiones descollaron ı hayan alcanzado alguń puesto de distinción en sociedad. Manila. Imp. Casa Editora "Renacimiento", 1917-1918. pahina 543-547. (Univ. of Michigan Digital Library)

• Album histórico de la primera Asamblea filipina. Compilado por Anthony R. Tuohy. Fotografias y biografias reproducidas de "La revista filipina" suplemento español del The far eastern review. Kaglagda: Philippine Legislature. Nalagda: 1908. p. 19. (Univ. of Michigan Digital Library)