Estado nin Sequoyah
An Estado nin Sequoyah iyo an pinagproponer na estado na itogdas para sanang gayo sa mga banwang Indyan na tubong natural sa Amerika, orog na partikular sa teritoryo kun saen mayoriya mga Indiyan an nag'eerok. Kan 1905, an inapod na Limang Sibilisadong Tribu- an Cherokee, Chickasaw, Choctaw, Creek (Muscogee), asin Seminole — na yaon nagbabanwa sa teritoryong Indiyan nagproponer paagi nin sarong kumbensyon na magmukna nin sarong estado ngane saindang makontrol asin masegurong kapot ninda an saindang kadagaan. An saindang intensyon iyo na magkaigwa sinda nin sarong konstitusyon sa irarom nin paggogobyerno ninda mansana. An estado tuyong pigngaranan na Sequoyah sa pag'onra sa sarong Cherokeeng Indiyan na nagmukna nin sistema nin pagsurat para sa lenggwaheng Cherokee [1]
| Estado nin Sequoyah | |
|---|---|
 Selyo kan Estado | |
 Proponidong Estado kan Sequoyah | |
| Kumbenson konstitusyonal: | Agosto 21, 1905 |
| Presidente kan Kumbensyon: | Pleasant Porter |
| Mga Bise Presidente | William C. Rogers, Cherokee William H. Murray, Chickasaw |
| Pagkaestado | |
| Aprobado 1905 kan reperendum. Pigsayumahan kan Kongreso nin Estados Unidos. Nagin parte kan estado nin Oklahoma kan 1907. | |
Pagsusog kan mga nakaagɪ
baguhon
Poon 1890 kan an Kongreso pinasar an Organikong Akto nin Oklahoma, an kadagaan na ngonyan binibilog kan estado nin Oklahoma, nababanga' sa duwang suway na teritoryoː Teritoryo Oklahoma sa bandang solnopan, asin an Teritoryong Indiyan sa subangan. An huri mayoriya an nagbabanwa mga Indiyan. Totoo an teritoryong ini nagparasadit huli sa pagsakop pakatapos kan Gera Sibil, mga pag'aanab asin huli pa sa ibang mga tratado sa Estados Unidos. Kan sensus nin 1900, an populasyon kan mga Indiyan nagbilang na sana nin 60,000 na persona sa total kaining 600,000 sa nasabing Teritoryong Indiyan. Dati daa an kadakulan kan mga Indiyan habo kuta magkaigwang sadiring estado na binibilog kan mga nasyon na Indiyan alagad kan an Kongreso kan Marso 4, 1906 nagboot na pasaon na an mga suway na gobyernong Indiyan asin waraon na an mga dagang komunal, an mga lider na Indiyan nag'isip na magmukna na nin sadiring estado na an siring na kaisipan binunga an inaapod na Sequoyah Convention na ginibo kan Agosto 21 asin 22, dangan kan Septyembre 5 sundo 8, taon 1905[2]
An kumbensyon konstitusyonaɬ
baguhonAn Sequoyah kumbensyon konstitusyonal nagtiripon sa Muskogee kan Agosto n21, 1905. Si General Pleasant Porter, pamayo kan Nasyon Creek, iyo an napiling presidente kan kumbensyon. Si mga elehidong mga delegado pigmarhay na an mga opisyal ehekutibo kan Limang Sibilisadong Tribu manombrahan na mga bise-presidenteː William C. Rogers, Prinsipal kan mga Cherokees; William H. Murray, nombrado ni Gobernador Douglas H. Johnston marepresentar para sa mga Chickasaws; Pamayo Green McCurtain kan Choctaws; Pamayo John Brown kan Seminoles; asin Charles N. Haskell, pinili na marepresentar kan Creeks (ta si General Porter napili nang Presidente). Si peryodistang Alexander Posey iyo an sekretaryong pinili.
An kumbensyon nagpanday nin sarong konstitusyon, naghaman nin plano sa pag'organisar nin gobyerno, nagbilog nin sarong mapa na pinapaheling an mga banwaan na mamumukna asin nagpili nin mga delegado na ipapadara sa Kongreso kan Estados Unidos sa pagpetisyon nin pagkaestado kan binibilog na teritoryong Indiyan. Kan Nobyembre 7, 1905, an mga botante sa teritoryo pigaprobaran an enot, an konstitusyon asin ikaduwa, an petisyon na ibali an saindang teritoryo bilang saro sa estado kan EU, sa botong 56,279. An dai nag'oyon nagbilang sanang 9,073[3]
An pagpalyang dai maako sa Estados Unidos
baguhonAn proponidong estado dai nangyari huli ta an Kongreso kontrolado kan mga kaapil sa Partido Republikano asin ta kadakulan kan mga botante sa nasambit na mga teritoryo kadakulan apil sa Partido Demokrata. May mga bill man kuta na pigtotolod an pagmukna kan estadong Sequoyah Indiyan arog kan dinara ni Representante Arthur P. Murphy sa ika-59ng Kongreso asin kan binubusol ni Senador Porter J. McCumber kan North Dakota alagad an mga ini dai nakaasba na maaprobaran. Katapustapusi si Presidente Theodore Roosevelt nagproponer nin bagong lakdang na an Teritoryong Indiyan isaro na sana sa Teritoryong Oklahoma na iyo an napangyari. Kaya an Oklahoma iyo an nagin ika-49ng estado kan Nobyembre 16, 1907[4]
